பழைய ரூபாய் நோட்டுகளை சட்டவிரோதமான முறையில் புதிய ரூபாய் நோட்டுகளாக மாற்றிய 4 வங்கி ஊழியர்களை வேலை விட்டு நீக்கியுள்ளதாக, ஹெச்டிஎஃப்சி வங்கி அறிவித்துள்ளது.
இதுகுறித்து அந்த வங்கியின் சார்பில், சனிக்கிழமை வெளியிடப்பட்ட அறிக்கையில் கூறப்பட்டுள்ளதாவது:
அண்மையில், ஹெச்டிஎஃப்சி வங்கியின் மின்னணுப் பதிவுகளில் முறைகேடு நடைபெற்றது தெரிய வந்ததை அடுத்து, அதுதொடர்பாக உள்விசாரணை மேற்கொள்ளப்பட்டது. அதில், சண்டீகரின் சர்வீஸ்-15 கிளையைச் சேர்ந்த 4 ஊழியர்கள், பழைய ரூபாய் நோட்டுகளை சட்டவிரோதமான முறையில் மாற்றியிருப்பது தெரியவந்தது.
அந்த ஊழியர்களில் ஒருவருக்குத் தெரிந்த நபர், அதிக அளவில் ரொக்கமாக இருந்த பழைய ரூபாய் நோட்டுகளை மாற்றுவதற்கு, மற்ற 3 பேரும் உடந்தையாக இருந்துள்ளனர்.
இந்தத் தகவல் தெரிய வந்ததை அடுத்து, அந்த 4 பேரும் பணிநீக்கம் செய்யப்பட்டுள்ளனர்.
இதனிடையே, பஞ்சாப் மாநிலம், பதிண்டாவில் உள்ள பொதுத்துறை வங்கி ஒன்றில் பழைய ரூபாய் நோட்டுகளை மாற்றுவதற்கு பணம் வசூலித்ததாக, அந்த வங்கியின் மேலாளரையும் காசாளரையும் போலீஸார் வெள்ளிக்கிழமை கைது செய்தனர்.