இந்தியாவில் ஆராய்ச்சிப் படிப்புகளில் ஈடுபடும் மாணவர்களில், பெண்களை விட ஆண்களின் எண்ணிக்கையே அதிகளவில் இருப்பதாக மத்திய மனிதவள மேம்பாட்டு அமைச்சக தரவுகள் தெரிவிக்கின்றன.
அந்த அமைச்சக தரவுகளில் கடந்த 3 ஆண்டு தரவுகளை பிடிஐ செய்தி நிறுவனம் மதிப்பீடு செய்துள்ளது.
அதன்படி, ஆராய்ச்சிப் படிப்புகளில் ஈடுபடும் மாணவர்களின் எண்ணிக்கை மொத்தமாக அதிகரித்துள்ளது. நாடு முழுவதும் உள்ள பல்கலைக்கழகங்களில் கடந்த 2014-15 காலகட்டத்தில் 1,00,792 பேர் ஆராய்ச்சிப் படிப்புகளுக்காக தங்களை பதிவு செய்துகொண்டனர். இதுவே, 2015-16 காலகட்டத்தில் 1,09,552-ஆகவும், 2016-17 காலகட்டத்தில் 1,23,712-ஆகவும் அதிகரித்துள்ளது. இதில், இருபால் மாணவர்களை ஒப்பிடுகையில், பெண்களை விட ஆண்களின் எண்ணிக்கை அதிகமாக உள்ளது.
2014-15 காலகட்டத்தில் ஆராய்ச்சிப் படிப்புகளில் ஈடுபட்ட பெண்களின் எண்ணிக்கையோடு ஒப்பிடுகையில், ஆண்களில் 21,000 பேர் அதிகமாக இருந்தனர். அதேபோல், 2015-16 காலகட்டத்தில் 21,688 ஆண்களும், 2016-17 காலகட்டத்தில் 21,882 ஆண்களும் அதிகம் இருந்தனர். தேசிய முக்கியத்துவம் வாய்ந்த கல்வி நிறுவனங்களை விட, மாநிலங்களில் உள்ள பல்கலைக்கழகங்களிலேயே அதிக எண்ணிக்கையிலான மாணவர்கள் ஆராய்ச்சி படிப்புகளில் பதிவு செய்துள்ளனர். 2016-17 கல்வியாண்டில் மாநில பல்கலைக்கழகங்களில் 41,566 பேர் ஆராய்ச்சி படிப்புகளுக்காக இணைந்த நிலையில், அதே காலகட்டத்தில் தேசிய முக்கியத்துவம் வாய்ந்த கல்வி நிறுவனங்களில் 26,012 பேர் மட்டும் இணைந்துள்ளனர்.
இதேபோல், 2016-17 காலகட்டத்தில் ஆராய்ச்சிப் படிப்புக்காக 17,715 மாணவர்கள் மத்திய பல்கலைக்கழங்களில் பதிவு செய்துள்ள நிலையில், 16,595 மாணவர்கள் தனியார் பல்கலைக்கழகங்களில் பதிவு செய்துள்ளனர். இதே நிலையே 2014-15, 2015-16 காலகட்டத்திலும் காணப்பட்டுள்ளது.