தென்கிழக்கு வங்கக் கடலில் நிலைகொண்டிருந்த ஆழ்ந்த காற்றழுத்தத் தாழ்வு மண்டலம் சனிக்கிழமை மாலை வலுவடைந்து, புயலாக உருவானது. இந்த புயலுக்கு "பெய்ட்டி' என்று பெயர் சூட்டப்பட்டுள்ளது.
இது அடுத்த 24 மணி நேரத்தில் தீவிர புயலாக மாறவுள்ளது. ஆந்திர கடலோரம் மசூலிப்பட்டினம்-காக்கிநாடா இடையே திங்கள்கிழமை (டிச.17) பிற்பகலில் கரையைக் கடக்கக்கூடும் என்று எதிர்பார்க்கப்படுகிறது.
இதன் காரணமாக, சென்னை உட்பட வடதமிழகத்தில் ஒரு சில இடங்களில் ஞாயிற்றுக்கிழமை மிதமான மழையும், ஓரிரு இடங்களில் பலத்த மழையும் பெய்யும் என்று வானிலை ஆய்வு மையம் தெரிவித்துள்ளது.
தென் மேற்கு வங்கக்கடல் மற்றும் மத்திய மேற்கு வங்கக் கடல் பகுதிகளுக்கு ஞாயிற்றுக்கிழமை, திங்கள்கிழமை (16, 17) ஆகிய நாள்களில் மீனவர்கள் செல்ல வேண்டாம் என்று அறிவுறுத்தப்பட்டுள்ளது.
இந்நிலையில், ஆந்திர கடலோரப் பகுதிகளில் டிசம்பர் 16,17 ஆகிய தேதிகளில் கனமழை பெய்யும். புயலால் கோதாவரி, விசாகப்பட்டினம், கிருஷ்ணா, குண்டூர் மாவட்டங்கள் பாதிக்கப்பட வாய்ப்புள்ளது. புதுச்சேரி யூனியன் பிரதேசத்தைச் சேர்ந்த ஏனம் மாவட்டமும் பாதிக்கப்பட வாய்ப்புள்ளதாக வானிலை ஆய்வு மையம் எச்சரித்துள்ளது.