ஒடிஸாவில் மாவோயிஸ்டுகள் ஆதிக்கம் மிகுந்த மல்கான்கிரி மாவட்டத்தில் கிராமங்களை நகர்ப் பகுதிகளுடன் இணைக்கும் விதமாகக் கட்டப்பட்டுள்ள புதிய பாலத்தை, முதல்வர் நவீன் பட்நாயக் ஜூலை 18-ஆம் தேதி திறந்துவைக்க உள்ளார்.
இதுகுறித்து சித்ரகொண்டா தொகுதி பிஜூ ஜனதா தள எம்எல்ஏ தம்பாரு சிசா கூறியதாவது: ஜன்பை ஆற்றின் குறுக்கே கட்டப்பட்டுள்ள 912 மீட்டர் நீளமுள்ள 'குருபிரியா' என்ற பாலம், வரும் 18-ஆம் தேதி திறந்துவைக்கப்பட உள்ளது.
இப்பாலமானது, மாவோயிஸ்ட் தீவிரவாதிகளின் ஆதிக்கம் மிகுந்த மல்கான்கிரி மாவட்டத்தில் எளிதில் அணுக முடியாத 9 கிராமப் பஞ்சாயத்துகளை அண்டை நகரங்களுடன் இணைக்கிறது. இதன்மூலம் அப்பகுதி மக்களின் 40 ஆண்டு கால கோரிக்கை நிறைவேற்றப்பட்டுள்ளது என்றார் அவர்.
முன்னதாக, 1982-ஆம் ஆண்டில் அப்போதைய முதல்வர் ஜே.பி.பட்நாயக் முயற்சியால் இப்பகுதியில் பாலம் கட்ட அடிக்கல் நாட்டப்பட்டது. ஆனால், மாவோயிஸ்டுகளின் அச்சுறுத்தலால் இத்திட்டம் தாமதமடைந்து வந்தது.
இந்நிலையில், 2014-ஆம் ஆண்டு முதல்வர் நவீன் பட்நாயக் மீண்டும் அடிக்கல் நாட்டினார். இதைத் தொடர்ந்து, பாலத்தின் கட்டுமானப் பணிகள் விரைவாக மேற்கொள்ளப்பட்டது குறிப்பிடத்தக்கது.