குழந்தை
மழலைமொழி பேசி
தத்தி தத்தி நடை பயின்று
நடந்து ஓடி விட்டால்
குழந்தைப்பருவத்துக்கு
நிலையான விடுதலை !
சிறுமி
கன்னியாகி காதலியாகி
அன்புக் காதலனை
கை பிடித்து விட்டால்
கன்னிப்பருவத்துக்கு
முழுமையான விடுதலை !
வட்ட நிலா
வானில் முகம் மறைத்து
அமாவாசை வந்துவிட்டால்
முழுநிலவுக்கும் மாதத்தில்
ஒருநாள் விடுதலை !
மாணவன்
பள்ளிக்குச் சென்று
படித்து முடித்து
பணியில் அமர்ந்துவிட்டால்
மாணவப்பருவத்துக்கும்
நிரந்தர விடுதலை !
காதலர்கள்
காதல்மொழி பேசி
பாடி ஓடி மகிழ்ந்து
கணவன் மனைவியாக
வாழ்ந்து விட்டால்
அவர்கள் காதலுக்கு
எப்போதும் விடுதலை !
கல்
சிற்பியின் உளியில்
அடிபட்டு அடிபட்டு
அழகிய சிலையாகி
நின்று விட்டால்
கல்லுக்கும் உளிக்கும்
காலமெல்லாம் விடுதலை !
கட்டிளங்காளை
கல்யாணம் முடித்து
தந்தையாகி தாத்தாவாகி
முதுமை வந்து விட்டால்
காளைப்பருவத்துக்கு
நிலையான விடுதலை !
மனிதன்
பிறந்து வளர்ந்து வாழ்ந்து
ஆறடி மண்ணுக்குள்ளே
அடங்கி விட்டால்
மனித உயிருக்கும்
புனிதமான விடுதலை !