தீபாவளி திருநாளை முன்னிட்டு பொதுமக்கள் சென்னையில் இருந்து தங்களது சொந்த ஊர்களுக்குச் சென்றுவர வசதியாக, கோயம்பேடு பேருந்து நிலையத்தில் 26 சிறப்பு முன்பதிவு மையங்கள் உள்பட 29 கவுன்ட்டர்கள் திறக்கப்பட்டுள்ளன.
நாடு முழுவதும் வரும் 29 -ஆம் தேதி தீபாவளி பண்டிகை கொண்டாடப்படுகிறது. இதையொட்டி, சென்னையிலிருந்து ஏராளமான பொதுமக்கள் தங்களது சொந்த ஊர்களுக்குச் சென்றுவர வசதியாக, அக்டோபர் 26 -ஆம் தேதி 3,254 பேருந்துகள், 27 -ஆம் தேதி 3,992 பேருந்துகள், 28 -ஆம் தேதி 3,979 பேருந்துகள் என மொத்தம் 11,225 சிறப்பு பேருந்துகள் சென்னையிலிருந்து பல்வேறு பகுதிகளுக்கு இயக்கப்படுகின்றன.
கோயம்பேடு பேருந்து நிலையம், தாம்பரம்- சானடோரியம், பூந்தமல்லி, அண்ணாநகர் மேற்கு போக்குவரத்துக் கழக பேருந்து நிலையம், மாநில தேர்தல் ஆணைய அலுவலகம் முன்பு என 5 இடங்களிலிருந்து இந்த சிறப்பு பேருந்துகள் இயக்கப்படவுள்ளன.
இதேபோல், ஒவ்வொரு மாவட்டத்திலிருந்தும் அந்தந்த பகுதியில் உள்ள அரசு போக்குவரத்துக் கழகம் சார்பில் மொத்தம் 10 ஆயிரத்து 64 சிறப்பு பேருந்துகளும் இயக்கப்பட உள்ளன.
29 கவுன்ட்டர்கள் திறப்பு: பயணிகள் முன்பதிவு செய்ய வசதியாக, சென்னை கோயம்பேடு புறநகர் பேருந்து நிலையத்தில் 26 சிறப்பு முன்பதிவு மையங்கள், தாம்பரம் - சாணடோரியத்தில் 2 முன்பதிவு மையங்கள், பூந்தமல்லியில் ஒரு முன்பதிவு மையம் என மொத்தம் 29 சிறப்பு முன்பதிவு கவுன்ட்டர்கள் திறக்கப்பட்டுள்ளன.
ஆண்கள், பெண்களுக்கென தனித்தனியாக அமைக்கப்பட்டுள்ள இந்தக் கவுன்ட்டர்களில் காலை 7 மணி -இரவு 10 மணிவரை பயணிகள் முன்பதிவு செய்யலாம்.
நாளை முதல் இயக்கம்: சிறப்பு பேருந்துகள் 26-ஆம் தேதி முதல் இயக்கப்படவுள்ளன. இதற்காக சென்னை கோயம்பேடு பேருந்து நிலையத்தில் அமைத்துள்ள சிறப்பு கவுன்ட்டர்களில் 300 கி.மீ. தொலைவுக்கு மேல் உள்ள ஊர்களுக்குச் செல்லும் பயணிகள் திங்கள்கிழமை முதல் ஆர்வமுடன் முன்பதிவு செய்தனர்.
டோக்கன் வரிசைப்படி: 300 கி.மீ. தொலைவுக்கு குறைவாக உள்ள பகுதிகளுக்குச் செல்ல முன்பதிவு கிடையாது.
இந்தப் பயணிகள் தாங்கள் பயணம் செய்யும் நாளில் பேருந்து நிலையங்களுக்குச் சென்றால் அவர்களுக்கு டோக்கன் வழங்கப்படும். அதன்படி அவர்கள் பயணம் மேற்கொள்ளலாம்.
குறுஞ்செய்தி தகவல்: தீபாவளி பண்டிகையையொட்டி, சென்னையில் 4 தாற்காலிக பேருந்து நிலையங்கள் ஏற்படுத்தப்பட்டுள்ளன. இதையடுத்து, 2 மாதங்களுக்கு முன்பாகவே முன்பதிவு செய்தோருக்கு பேருந்து நிறுத்த மாற்றங்கள் குறித்து செல்லிடப்பேசியில் குறுஞ்செய்தி மூலம் தகவல் அளிக்கப்பட உள்ளதாக முன்பதிவு மைய அதிகாரிகள் தெரிவித்தனர்.