ராதிகா சரத்குமாரின் ராடன் மீடியா நிறுவனத்தில் வருமான வரித்துறை சோதனை!

சென்னை: நடிகர் சரத்குமாரின் மனைவி ராதிகாவுக்குச் சொந்தமான ராடன் மீடியா நிறுவனத்தில் வருமான வரித்துறையினர் சோதனை நடத்தி வருகின்றனர்.    

நடிகர் சரத்குமாரின் கொட்டிவாக்கம் இல்லத்தில் கடந்த 7-ஆம் தேதியன்று வருமான வரித்துறையினர் 'திடீர்' சோதனை நடத்தினார்கள். அதனைத் தொடர்ந்து அவரை நேரில் ஆஜராகி விளக்கம் அளிக்குமாறு வருமான வரித்துறை சம்மன் அனுப்பியிருந்தது.

நேற்று காலை 11.30 மணி அளவில் நுங்கம்பாக்கத்தில் உள்ள வருமான வரித்துறை அலுவலகத்தில் ஆஜரான அவரிடம் இரவு 7.20 மணி வரை தொடர் விசாரணை நடந்தது. 

இந்நிலையில் அவரது மனைவியும் நடிகையுமான ராதிகாவுக்கு சொந்தமான ராடன் மீடியா நிறுவனத்தில் தற்பொழுது வருமான வரித்துறையினர் சோதனை நடத்தி வருகின்றனர். சென்னை தி.நகரில் உள்ள அவரது அலுவலகத்தில் இந்த சோதனைநடந்து வருகிறது.       

ராடன் மீடியா நிறுவனமானது தொலைக்காட்சி தொடர்கள் மற்றும் திரைப்படங்கள் தயாரிப்பு பணியில் ஈடுபட்டு வருகிறது.