முதல்வர் ஓ.பன்னீர்செல்வம், அதிமுக பொதுச்செயலர் வி.கே.சசிகலா ஆகியோர் தனித் தனியே ஆளுநர் வித்யாசாகர் ராவை சந்தித்த பிறகு தமிழக அரசியல் களம் மேலும் விறுவிறுப்படைந்துள்ளது.
வியாழக்கிழமை காலை முதல் மாலை வரை நடைபெற்ற நிகழ்வுகள் விவரம்:
நண்பகல் 12: அதிமுக அவைத் தலைவர் இ.மதுசூதனன் ஓ.பி.எஸ். இல்லத்துக்கு நேரில் சென்று அவருக்கு ஆதரவைத் தெரிவித்தார்.
பிற்பகல் 1: அதிமுகவின் மூத்த உறுப்பினரும், முன்னாள் சட்டப் பேரவை உறுப்பினருமான ஜே.சி.டி.பிரபாகர், ஓ.பன்னீர்செல்வத்தின் இல்லத்துக்குச் சென்று அவரை நேரில் சந்தித்து தனது ஆதரவைத் தெரிவித்தார்.
பிற்பகல் 3.30: மும்பையில் இருந்து தமிழகத்தின் பொறுப்பு ஆளுநர் வித்யாசாகர் ராவ், சென்னை திரும்பினார்.
மாலை 4.30 மணி: ஆளுநர் வித்யாசாகர் ராவைச் சந்திக்க, தனது இல்லத்தில் இருந்து புறப்பட்டார் ஓ.பன்னீர்செல்வம்.
மாலை 5: அதிமுகவின் மூத்த உறுப்பினர்களான பி.எச்.பாண்டியன், மதுசூதனன் ஆகியோருடன் ஆளுநர் வித்யாசாகர் ராவை, முதல்வர் ஓ.பன்னீர்செல்வம் சந்தித்துப் பேசினார்.
மாலை 6.45: போயஸ் தோட்ட இல்லத்தில் இருந்து புறப்பட்ட அதிமுக பொதுச் செயலாளர் வி.கே.சசிகலா, முன்னாள் முதல்வர் ஜெயலலிதா உள்ளிட்டோரின் நினைவிடங்களில் மலர் தூவி அஞ்சலி செலுத்தினார்.
இரவு 7.20: தனது தலைமையில் ஆட்சி அமைக்க அனுமதி கோரி, ஆளுநர் வித்யாசாகர் ராவைச் சந்திக்க ஆளுநர் மாளிகைக்குச் சென்றார் வி.கே.சசிகலா.
இரவு 8: ஆளுநர் வித்யாசாகர் ராவைச் சந்தித்த பிறகு, ஆளுநர் மாளிகையில் இருந்து புறப்பட்டு போயஸ் தோட்ட இல்லத்துக்குச் சென்றார் சசிகலா.