அலங்காநல்லூரில் பொதுமக்கள், இளைஞர்கள் செவ்வாய்க்கிழமை ஜல்லிக்கட்டுக்கு ஆதரவாக நடத்திய போராட்டத்தில் திமுக சட்டப்பேரவை உறுப்பினர்கள் பி. மூர்த்தி (மதுரை கிழக்கு), பி.டி.ஆர். பழனிவேல் தியாகராஜன் (மதுரை மத்தி) ஆகியோர் பங்கேற்றனர். அப்போது சோழவந்தான் அதிமுக சட்டப்பேரவை உறுப்பினர் கே. மாணிக்கம் வந்தார். அவரை எதிர்த்து அங்கிருந்த திமுகவினர் மற்றும் போராட்டத்தில் இருந்தவர்கள் கோஷமிட்டனர்.
பகலில் நாம் தமிழர் கட்சித் தலைவர் சீமான் மற்றும் இயக்குநர் அமீர் ஆகியோர் வந்து கூட்டத்தினரிடையே பேசினர். அப்போது அரசியல் வேண்டாம் என கூட்டத்தின் ஒரு பகுதியினர் கோஷமிட்டனர். சமத்துவ மக்கள் கட்சித் தலைவர் நடிகர் சரத்குமார் வந்து கூட்டத்தில் அமர்ந்தார். அப்போது அரசியல் வேண்டாம் என சிலர் கோஷமிட்டதால் தள்ளுமுள்ளு ஏற்பட்டது. திரைப்பட இசையமைப்பாளர் ஜீ.வி. பிரகாஷ், இயக்குநர் கார்த்திக் சுப்புராஜ் உள்ளிட்டோரும் நேரில் வந்து போராட்டத்துக்கு ஆதரவு தெரிவித்தனர். போராட்டத்தில் கைதானவர்களை சீமான், அமீர் மற்றும் நடிகர் சரத்குமார் ஆகியோர் நேரடியாக சந்தித்து ஆதரவு தெரிவித்தனர்.
ஒன்றுபட்டுக் குரல் கொடுப்போம்: நடிகர் சூர்யா
நமது பண்பாட்டையும், அடையாளத்தையும் அழிக்கும் முயற்சிகள் வேறு எந்த வடிவில் வந்தாலும், இதேபோல ஒன்றுபட்டு குரல்கொடுப்போம் என நடிகர் சூர்யா தெரிவித்துள்ளார்.
ஜல்லிக்கட்டுககு ஆதரவாக பல்வேறு தரப்பினர் தங்களது ஆதரவைத் தெரிவித்து வருகின்றனர். இந்தநிலையில் நடிகர் சூர்யா போராட்டக்காரர்களுக்கு தனது ஆதரவை வெளிப்படுத்தும் விதமாக ஒரு அறிக்கையை வெளியிட்டுள்ளார்.
அதில் சூர்யா கூறியதாவது: ஜல்லிக்கட்டு நடத்த தடை வாங்கி பொதுப் பிரச்னைகளுக்கு இளைஞர்களை ஒன்றுகூடி போராடத் தூண்டிய அனைவருக்கும் நன்றி.
தன்னெழுச்சியான போராட்டங்களில் எப்போதுமே உண்மை இருக்கும். பல நூற்றாண்டுகளாக தமிழகத்தில் நடைபெற்று வரும் ஜல்லிக்கட்டு. மாடுகளுக்கு எதிரானது என்று பொய்ப் பிரசாரம் செய்து நீதிமன்றத்தில் வெற்றியும் பெற்ற பீட்டா அமைப்பு, மக்கள் மன்றத்தில் தோற்றிருக்கிறது.
அமைதியான வழியில் உரிமைகளை நிலைநாட்ட போராடுகிற அனனவருக்கும் என் பாராட்டுகளையும் வாழ்த்துகளையும் உரித்தாக்குகிறேன். போராடுகிறவர்களின் உணர்வோடு நானும் கைகோர்க்கிறேன்.
வெற்றி பெறும்: மக்களின் போராட்டம் வெற்றி பெற்று ஜல்லிக்கட்டு விரைவில் நடைபெறும். அதில் எந்த மாற்றமும் இல்லை. நமது பண்பாட்டையும், அடையாளத்தையும் அழிக்கும் முயற்சிகள் வேறு எந்த வடிவில் வந்தாலும், இதேபோல ஒன்றுபட்டுக் குரல் கொடுப்போம் என அதில் கூறியுள்ளார்.