தமிழர்களின் கலாசாரம், உடை பிடித்துள்ளது என ஆஸ்திரேலிய கிரிக்கெட் வீரர் மேத்யூ ஹைடன் தெரிவித்தார்.
விளாச்சேரியில் உள்ள தனியார் கல்லூரி ஒன்றில் மாணவர் சந்திப்பு நிகழ்ச்சியில் திங்கள்கிழமை பங்கேற்று அவர் பேசியதாவது: இந்தியாவில் எனக்கு பிடித்த பகுதியாக தமிழகம் உள்ளது. தமிழர்களின் கலாசாரம், உடை உள்ளிட்டவைகள் எனக்கு பிடித்துள்ளன. நான் கடந்த முறை வந்தபோது இருந்ததை விட தற்போது தமிழகத்தில் விளையாட்டுத் துறையில் இளைஞர் அதிக ஆர்வத்துடன் உள்ளனர்.
மாணவர்கள் படிப்போடு விளையாட்டுத் துறையிலும் ஆர்வம் செலுத்த வேண்டும். விளையாட்டுத் துறையில் நல்ல எதிர்காலம் உள்ளது. திறமைகளை வளர்த்துக் கொண்டு விளையாட்டுத் துறையின் மூலமாகவும் மாணவர்கள் சாதிக்கலாம் என்றார். முன்னதாக, கல்லூரியின் புதிய உடற்கல்வி கட்டடத்தை அவர் திறந்து வைத்தார். பின்னர் கல்லூரி மைதானத்தில் மாணவர்களுடன் சிறிது நேரம் அவர் கிரிக்கெட் விளையாடினார். பின்பு நடைபெற்ற மாணவர் சந்திப்பு நிகழ்ச்சியில் பல்வேறு விளையாட்டுப் போட்டிகளில் வெற்றி பெற்ற மாணவர்களுக்கு பரிசுகளை வழங்கினார்.