கர்நாடகத்தில் உள்ள எம்எல்ஏ-க்களை வெளியே விடத் தயாரா என்று டிடிவி தினகரனுக்கு முதல்வர்எடப்பாடி பழனிசாமி சவால் விடுத்தார்.
அடைத்து வைக்கப்பட்டிருக்கும் எம்எல்ஏக்களைவெளியே விட்டால் அவர்கள் எங்களோடு சேர்ந்துவிடுவார்கள் என்றும் அவர் தெரிவித்தார்.
முன்னாள் முதல்வர் அண்ணாவின் 109-ஆவது பிறந்தநாள் விழா சென்னை தங்கசாலை மணிக்கூண்டு அருகே சனிக்கிழமை (செப்.15) நடைபெற்றது. இந்தக் கூட்டத்துக்கு அதிமுக வடசென்னை வடக்கு மாவட்டசெயலாளர் பாலகங்கா தலைமை வகித்தார். இந்தக் கூட்டத்தில் முதல்வரும் அதிமுக இணை ஒருங்கிணைப்பாளருமான எடப்பாடி பழனிசாமி பேசியதாவது:
நான் 9 முறை தேர்தலில்போட்டியிட்டேன்; 6 முறை வெற்றி பெற்றேன். ஒரு முறை எம்.பி. தேர்தலில் போட்டியிட்டு தோல்வியடைந்தேன்; மறைந்த முதல்வர் ஜெயலலிதாதான் எனக்கு சீட் கொடுத்தார், அவருடைய செல்வாக்காலும் மக்கள்ஆதரவாலும் வெற்றி பெற்றேன். நீங்கள் ஒரே நாளில் உறுப்பினராகி கட்சியையும் ஆட்சியையும் பிடித்து விடலாம் என்று நினைக்கீறீர்கள்; உங்களுடைய கனவு பலிக்காது. அதிமுகவை எவராலும் அசைக்க முடியாது.
நான் பலமுறை போராட்டங்களை நடத்தியிருக்கிறேன் . மறைந்த முதல்வர் ஜெயலலிதா விமான நிலையத்தில் இருந்துதிரும்பிய போது அவர் மீது லாரி ஏற்றிக் கொல்ல முயற்சி நடந்தது. அதற்காக போராட்டம் நடத்தி 10 நாள்கள் சிறையில் இருந்தேன்; 6 முறை நான் சிறைக்கு போயிருக்கிறேன்; நான் கட்சிக்காக போராட்டம் நடத்தி சிறைக்குப் போனேன்.
நாங்கள் நடத்துவது பெரும்பான்மை ஆட்சி..: குறுக்கு வழியில் ஆட்சியை பிடிக்க வேண்டும் என்று எண்ணுபவர்களின் ஆசை ஒரு போதும் நிறைவேறாது. நீங்கள் எம்எல்ஏக்களை அறையில் அடைத்து வைத்திருக்கிறீர்கள்; அவர்களை வெளியே விட்டுப் பாருங்கள்; எங்களோடு வந்து சேர்ந்துவிடுவார்கள்; நாங்கள் பெரும்பான்மை ஆட்சி நடத்துகிறோம்; 96 எம்எல்ஏ-க்களுடன் மைனாரிட்டி ஆட்சி நடத்திய திமுகவுக்கு எங்களைக் குறை சொல்ல எந்தத் தகுதியும் இல்லை. கட்சியை உடைக்கவும் ஆட்சியைக் கவிழ்க்கவும் திமுவோடு சேர்ந்து தினகரன் நாடகம் நடத்துகிறார் என்றார் முதல்வர் எடப்பாடி கே.பழனிசாமி.