கோத்தகிரி நகரப் பகுதியில் அமைந்துள்ள குடியிருப்புகள், தேயிலைத் தோட்டங்களில் நடமாடும் காட்டெருமைகளை வனப் பகுதிக்குள் விரட்ட வேண்டும் என பொதுமக்கள் கோரிக்கை விடுத்துள்ளனர்.
நீலகிரி மாவட்டம், கோத்தகிரி நகரின் மையப் பகுதியில் அமைந்துள்ள வியூ ஹில், மாரியப்பன் வீதி, காம்பாய் கடை, சேட் லைன் உள்ளிட்ட பகுதிகளில் 500-க்கும் மேற்பட்ட குடும்பங்கள் உள்ளன. இப்பகுதியில் கடந்த சில நாள்களாக காட்டெருமைகளின் நடமாட்டம் அதிகரித்துள்ளது. குடியிருப்பை ஒட்டியுள்ள தேயிலைத் தோட்டங்களில் தங்கும் காட்டெருமைகள், அவ்வப்போது குட்டிகளுடன் குடியிருப்புப் பகுதிக்குள் புகுந்து மக்களை அச்சுறுத்தி வருகின்றன.
சில நாள்களுக்கு முன் இங்குள்ள குழந்தைகள் காப்பகம் அருகே மேய்ந்து கொண்டிருந்த காட்டெருமை தாக்கியதில் பசு மாடு உயிரிழந்தது. காட்டெருமைகளைக் கட்டுப்படுத்துவதற்காக, பசும் புல்வெளிகளுக்கு மருந்து தெளித்து கருகச் செய்ய வேண்டிய நிலை விவசாயிகளுக்கு ஏற்பட்டுள்ளது. எனவே, இப்பகுதியில் அசம்பாவிதம் நடப்பதற்கு முன் குடியிருப்புகளின் அருகில் திரியும் காட்டெருமைகளை அடர்ந்த வனப் பகுதிக்குள் விரட்ட வனத் துறையினர் நடவடிக்கை எடுக்க வேண்டும் என்று இப்பகுதி மக்கள் வலியுறுத்தியுள்ளனர்.