கஜா புயலால் கடுமையாகப் பாதிக்கப்பட்டுள்ள நாகப்பட்டினம், புதுக்கோட்டை, ராமநாதபுரம் உள்ளிட்ட 6 மாவட்டங்களில் மருத்துவக் குழுக்களின் எண்ணிக்கை 2,214-ஆக அதிகரிக்கப்பட்டுள்ளது. புயலால் பாதிக்கப்பட்ட மாவட்டங்களில் கடந்த 5 நாள்களில் மட்டும் 1 லட்சத்து 35 ஆயிரத்து 271 பேருக்கு சிகிச்சை அளிக்கப்பட்டுள்ளது.
இதுகுறித்து சுகாதாரத் துறை அமைச்சர் சி.விஜயபாஸ்கர் செவ்வாய்க்கிழமை வெளியிட்ட செய்திக் குறிப்பு:
கஜா புயலால் பாதிக்கப்பட்ட கடலூர், நாகப்பட்டினம், திருவாரூர், தஞ்சாவூர், புதுக்கோட்டை, ராமநாதபுரம் மாவட்ட மக்களுக்கு சிகிச்சை அளிக்கும் வகையில் மருத்துவ முகாம்களின் எண்ணிக்கை 2,214-ஆக அதிகரிக்கப்பட்டுள்ளது. இதன்மூலம், கடந்த 5 நாள்களில் 1,35,271 பேருக்கு சிகிச்சை அளிக்கப்பட்டுள்ளது.
இப்பணிகளில், 900-க்கும் மேற்பட்ட மருத்துவர்கள், செவிலியர்கள், சுகாதாரப் பணியாளர்கள் ஈடுபடுத்தப்பட்டுள்ளனர். ரோட்டரி சங்கம், தன்னார்வத் தொண்டு நிறுவனங்களுடன் இணைந்து கூடுதலாக மருத்துவ முகாம்கள், கொசு ஒழிப்புப் பணிகளும் மேற்கொள்ளப்பட்டு வருகிறது. இதுவரை 3 லட்சத்து 70 ஆயிரம் பேருக்கு நிலவேம்புக் குடிநீர் வழங்கப்பட்டுள்ளது. 6 மாவட்டங்களில் நோய்த் தடுப்புப் பணிக்காக கூடுதலாக 400 டன் பிளீச்சிங் பவுடர் விநியோகிக்கப்பட்டு வருகிறது.
ரூ.80 லட்சம் கூடுதல் நிதி ஒதுக்கீடு: 6 மாவட்டங்களுக்கு மட்டும் மாத்திரைகள் வாங்க கூடுதலாக ரூ. 80 லட்சம் நிதி ஒதுக்கீடு செய்யப்பட்டுள்ளது. இந்த மாவட்டங்களில் பணியில் உள்ள சுகாதாரத் துறை துணை இயக்குநர்களுக்கு உதவியாக ஒவ்வொரு மாவட்டத்துக்கும் கூடுதலாக இரண்டு துணை இயக்குநர்கள் தலைமையிலான குழுக்கள் அனுப்பி வைக்கப்பட்டுள்ளன.