இஸ்லாமாபாத்: பாகிஸ்தானில் திங்களன்று வெளியாகியுள்ள இடைத்தேர்தல் முடிவுகளில் பிரதமர் இம்ரான் கானின் தெரீக் இ இன்ஷாப் கட்சிக்கு பின்னடைவு ஏற்பட்டுள்ளது.
பாகிஸ்தானில் கடந்த ஜூலை மாதம் நாடாளுமன்றத்துக்கும், பல்வேறு மாகாண சட்டசபைகளுக்கும் ஒரே நேரத்தில் பொதுத்தேர்தல் நடத்தப்பட்டது. அந்த தேர்தல்களில் போட்டியிட்ட வேட்பாளர்கள் பலரும் ஒன்றுக்கு மேற்பட்ட தொகுதிகளில் வெற்றி பெற்றனர்.
அந்நாட்டின் பிரதமர் இம்ரான்கான் தான் போட்டியிட்ட 5 நாடாளுமன்ற தொகுதிகளிலும் வென்றார். இப்படி வெற்றி பெற்றவர்கள் ஒரு தொகுதியை வைத்துக்கொண்டு எஞ்சிய தொகுதிகளில் ராஜிநாமா செய்தனர்.அவ்வாறு காலியான 35 தொகுதிகளில் ஞாயிறன்று இடைத்தேர்தல் நடைபெற்றது. அவற்றில் 11 தொகுதிகள் நாடாளுமன்ற தொகுதிகள் ஆகும். எஞ்சியவை மாகாண சட்டசபை தொகுதிகள் ஆகும்.
இந்த 11 நாடாளுமன்ற தொகுதிகளில் 9 தொகுதிகள் பஞ்சாப் மாகாணத்திலும், சிந்து மற்றும் கைபர் பக்துங்வா மாகாணங்களில் தலா ஒரு தொகுதியும் உள்ளன. மொத்தமுள்ள 35 தொகுதிகளில் 641 வேட்பாளர்கள் வேட்பு மனுக்கள் தாக்கல் செய்தனர். இறுதிக்கட்ட பரிசீலனைக்குப் பிறகு தற்போது 372 வேட்பாளர்கள் களத்தில் உள்ளனர்.
இடைத்தேர்தலுக்காக பாகிஸ்தானில் 5 ஆயிரத்து 193 வாக்குச்சாவடிகள் அமைக்கப்பட்டுள்ளன. அவற்றில் 848 வாக்குச்சாவடிகள் மிகுந்த பதற்றமானவை என அறிவிக்கப்பட்டுள்ளன.
காலை 8 மணியளவில் துவங்கிய வாக்குப் பதிவு மாலை 5 மணிவரை நடைபெற்றது. வாக்குப்பதிவு முடிந்த உடனேயே ஓட்டு எண்ணிக்கை துவங்கி, திங்கள் காலை முதல் முடிவுகள் வெளியிடப்பட்டன.
வெளியாகியுள்ள முடிவுகளில் பிரதமர் இம்ரான் கானின் தெரீக் இ இன்ஷாப் கட்சிக்கு பின்னடைவு ஏற்பட்டுள்ளது. அதேசமயம் முன்னாள் பிரதமரான நவாஸ் ஷெரீப்பின் பாகிஸ்தான் முஸ்லீம் லீக் கட்சிக்கு குறிப்பிடத்தக்க அளவில் இடங்கள் கிடைத்துள்ளது கவனிக்கத்தக்கது.