பெங்களூரில் நாளை தமிழ் அமைப்புகள் கூட்டம்

பெங்களூரில் மார்ச் 3-ஆம் தேதி அனைத்து தமிழ் அமைப்புகளின் கூட்டத்துக்கு பெங்களூரு தமிழ்ச் சங்கம் ஏற்பாடு செய்துள்ளது.
இதுகுறித்து பெங்களூரு தமிழ்ச் சங்கத் தலைவர் தி.கோ. தாமோதரன், செயலாளர் இராம சுப்பிமணியன் கூட்டாக வெளியிட்ட அறிக்கை:
பெங்களூரு விவேக் நகரில் உள்ள  குழந்தை ஏசு தேவாலயத்தில் அண்மையில் புகுந்த சில கன்னட அமைப்பினர், "தமிழில் வழிபாடு நடத்தக் கூடாது; கன்னடத்தில்தான் நடைபெற வேண்டும்.கன்னடத்தைத் தவிர எந்த பெயர் பலகையும் இருக்கக் கூடாது. குறிப்பாக தமிழ் பெயர் இருக்கக் கூடாது' என  கடிதம் அளித்திருந்தது குறித்து பிப்.28-ஆம் தேதி நடைபெற்ற பெங்களூரு தமிழ்ச் சங்க செயற்குழுவில் விவாதிக்கப்பட்டது.
இதுதொடர்பாக விவாதிக்க மார்ச் 3-ஆம் தேதி (ஞாயிற்றுக்கிழமை) காலை 10.30 மணிக்கு பெங்களூர் தமிழ்ச் சங்க வளாகத்தில் அனைத்து தமிழ் அமைப்புகளின் கூட்டம் நடத்த முடிவுசெய்யப்பட்டது. எனவே, இந்த கூட்டத்தில் அனைத்து தமிழ் அமைப்புக்களின் பிரதிநிதிகளும் கலந்துகொள்ளுமாறு கேட்டுக் கொள்கிறோம் என அதில் கூறப்பட்டுள்ளது.