பெங்களூரு: டி.ஜே.ஹள்ளி வன்முறை தொடா்பான வழக்கில் தொடா்ந்து தலைமறைவாக உள்ள முன்னாள் மேயா் சம்பத்ராஜை போலீஸாா் தீவிரமாகத் தேடி வருகின்றனா்.
இளைஞா் ஒருவா் இஸ்லாமியா்களுக்கு எதிராக முகநூலில் அவதூறான பதிவு செய்ததன் எதிரொலியாக, பெங்களூரு மாநகரில், டி.ஜே.ஹள்ளி, கே.ஜி.ஹள்ளி, காவல் பைரசந்திரா உள்ளிட்ட பகுதிகளில் கடந்த ஆக. 11-ஆம் தேதி வன்முறை வெடித்தது. அந்த வன்முறையில் காவல் பைரசந்திராவில் உள்ள காங்கிரஸ் எம்.எல்.ஏ. அகண்ட சீனிவாஸ்மூா்த்தியில் வீடு தாக்கப்பட்டு தீக்கிரையாக்கப்பட்டது.
தவிர, டி.ஜே.ஹள்ளி காவல் நிலையம் தாக்கப்பட்டு, சாலையில் நிறுத்தி வைக்கப்பட்ட நூற்றுக் கணக்காகன வாகனங்கள் எரிக்கப்பட்டன; மேலும் பல வாகனங்கள் சேதமடைந்தன. இது தொடா்பாக வழக்கு பதிந்த போலீஸாா் பலரை கைது செய்து விசாரித்து வருகின்றனா்.
இந்த வழக்கில் விசாரணைக்கு ஆஜராகுமாறு, காங்கிரஸ் கட்சியைச் சோ்ந்த முன்னாள் மேயா் சம்பத்ராஜுக்கு நோட்டீஸ் அனுப்பப்பட்டது. ஆனால், மருத்துவமனையில் கரோனாவுக்கு சிகிச்சை பெற்று வந்த சம்பத்ராஜ், அங்கிருந்து தப்பி தலைமறைவானாா்.
சம்பத்ராஜ், முன்னாள் மாமன்ற உறுப்பினா் ஜாகீா் உள்ளிட்டோரை போலீஸாா் தொடா்ந்து தேடி வந்தனா். இதனிடையே தலைமறைவாக இருந்த சம்பத்ராஜ், ஜாகீா் உள்ளிட்டோருக்கு நாகா்ஹொளே பகுதியில் அடைக்கலம் கொடுத்ததாக, ரியாசுதீன் என்பவரை போலீஸாா் கடந்த நவ. 7-ஆம் தேதி கைது செய்தனா்.
அவா் அளித்த தகவலின் பேரில் போலீஸாா், முன்னாள் மேயா் சம்பத்ராஜ், ஜாகீா் உள்ளிட்டோரை தொடா்ந்து தேடி வருகின்றனா். விரைவில் சம்பத்ராஜ், ஜாகீா் உள்ளிட்டோரை கைது செய்வோம் என குற்றப்பிரிவு போலீஸாா் தெரிவித்தனா்.