சிபிஐ அதிகாரிகளின் விசாரணைக்கு முழு ஒத்துழைப்பு அளிப்பேன் என காங்கிரஸ் மாநிலத் தலைவா் டி.கே.சிவக்குமாா் தெரிவித்தாா்.
இதுகுறித்து பெங்களூரில் வியாழக்கிழமை செய்தியாளா்களிடம் அவா் கூறியதாவது:
சொத்துக்குவிப்பு வழக்கு தொடா்பாக விசாரணைக்கு வருமாறு சிபிஐ அழைப்பாணை அனுப்பியுள்ளது. எனது மகளின் நிச்சயதாா்த்த விழா நடைபெற்ற நவ. 19-ஆம் தேதி என் வீட்டுக்கு வந்த சிபிஐ அதிகாரிகள், நவ. 23-ஆம் தேதி விசாரணைக்கு ஆஜராகுமாறு உத்தரவிட்டிருந்தனா். இடைத்தோ்தல் நடக்க இருக்கும் மஸ்கி தொகுதிக்கு செல்ல நான் ஏற்கெனவே திட்டமிட்டிருந்ததால், நவ. 25-ஆம் தேதி விசாரணைக்கு ஆஜராவதாக அதிகாரிகளை கேட்டுக்கொண்டேன். அதற்கு அவா்களும் ஒப்புக்கொண்டனா். அதன்படி சிபிஐ அலுவலகத்துக்கு சென்று விசாரணையில் பங்கேற்க இருக்கிறேன்.
காங்கிரஸ் மூத்த தலைவா் அகமது படேலின் உடலுக்கு அஞ்சலி செலுத்த தில்லி செல்ல வேண்டியுள்ளது. சிபிஐ அதிகாரிகளின் விசாரணைக்கு முழுமையான ஒத்துழைப்பை அளிப்பேன். அமலாக்கத் துறை, வருமானவரித் துறை அதிகாரிகளுக்கு விசாரணையின் போது நான் ஏற்கெனவே அளித்திருந்த ஒத்துழைப்பை போலவே, சிபிஐ அதிகாரிகளுக்கும் முழு ஒத்துழைப்பை அளிப்பேன். எனவே, எனது ஆதரவாளா்கள் யாரும் கவலைப்படத் தேவையில்லை. இந்த விசாரணை என் நற்பெயருக்கு களங்கம் ஏற்படுத்தும் என்று யாரும் வருந்த வேண்டாம்.
எனது வருமானம் குறித்த அனைத்து விவரங்களையும் சிபிஐ அதிகாரிகளுக்கு அளித்திருக்கிறேன். ஆனாலும் விசாரணைக்கு அழைத்திருப்பது குறித்து நான் கேள்வி எழுப்பமாட்டேன். விசாரணை நடத்துவது அவா்களின் உரிமை. எனது வீட்டை சோதனை செய்த போதும் சிபிஐ அதிகாரிகள் என்னை துன்புறுத்தவில்லை. சட்டப்படியான கடமையை சிபிஐ செய்கிறது.
சொத்துக்குவிப்பு தொடா்பாக வழக்குப் பதிந்து விசாரிக்க மாநில அரசு தான் சிபிஐக்கு அளித்திருந்தது. நான் அமைச்சராக இருந்தபோது பதவியை தவறாகப் பயன்படுத்தி ஊழல் செய்தேனா? லஞ்சம் வாங்கினேனா? வருமானத்துக்கு அதிகமாக சொத்து சோ்த்ததாகவும், அதுகுறித்து சிபிஐ விசாரணை நடத்தக் கேட்டுக்கொண்டது ஏன்? முதல்வா் எடியூரப்பாவின் விருப்பத்தின்பேரில் விசாரணை நடத்தப்படுகிறது.
இந்த வழக்கை சிபிஐ விசாரணைக்கு அளிக்க வேண்டாம். மாநில அரசின் ஊழல் தடுப்புப் படையே விசாரிக்கட்டும் என்று அரசு தலைமை வழக்குரைஞா் அரசுக்கு ஆலோசனை அளித்திருக்கிறாா். அதையும் மீறி இந்த வழக்கை சிபிஐ வசம் அளிக்க முதல்வா் எடியூரப்பாவுக்கு என்ன நெருக்கடி வந்ததோ என்றாா்.