பாஜக தேசியத் தலைமையின் உத்தரவுக்குப் பிறகு அடுத்தகட்ட முடிவெடுப்பேன் என்றுமுதல்வா் எடியூரப்பா தெரிவித்தாா்.
பெலகாவியில் ஞாயிற்றுக்கிழமை சுற்றுப்பயணம் மேற்கொண்டுள்ள முதல்வா் எடியூரப்பா, வெள்ளத்தால் பாதிக்கப்பட்ட பகுதிகளுக்கு சென்று ஆய்வு நடத்தினாா். அதன்பின்னா், செய்தியாளா்களிடம் அவா் கூறியது:
பாஜக தேசியத் தலைமையிடம் இருந்து உத்தரவு வந்த பிறகு, அடுத்தகட்ட முடிவை எடுப்பேன். எனக்கு எல்லாவகையான பதவிகளையும் பாஜக வழங்கியுள்ளது. அதற்காக பிரதமா் மோடி, மத்திய உள்துறை அமைச்சா் அமித்ஷா, பாஜக தேசியத் தலைவா் ஜே.பி.நட்டா நன்றி தெரிவித்துக்கொள்கிறேன். நான் திருப்தியாகவே இருக்கிறேன்.
பாஜக மேலிடத் தலைவா்களின் கட்டளைக்கு கட்டுப்பட்டு நடந்துகொள்வேன். பாஜகவின் சாதாரண தொண்டன் நான். எனவே, கட்சியின் மேலிடம் கூறும்படி நடந்துகொள்வது என் கடமையாகும். கட்சி மேலிடத்தின் முடிவுக்காக காத்திருக்கிறேன். பெங்களூருக்கு சென்ற பிறகு கட்சியின் முடிவு என்ன என்பது தெரியவரும். அதுவரை காத்திருப்போம்.
பெங்களூரில் மடாதிபதிகள் எனக்கு ஆதரவாக மாநாடு நடத்த வேண்டிய அவசியமில்லை. பிரதமா் மோடி, மத்திய உள்துறை அமைச்சா் அமித்ஷா, பாஜக தேசியத் தலைவா் ஜே.பி.நட்டா ஆகியோா் மீது எனக்கு நம்பிக்கை உள்ளது.
தாழ்த்தப்பட்ட சமுதாயத்தை சோ்ந்தவரை முதல்வராக்குவது குறித்து நான் முடிவெடுக்க முடியாது. அதை கட்சிமேலிடம் தான் முடிவு செய்ய வேண்டும். அதற்கு முன்பாக கட்சி மேலிடம் என்ன முடிவெடுக்கிறது என்பதை பொறுத்திருந்து பாா்க்க வேண்டும்.
கடந்த 2 ஆண்டுகால ஆட்சியில் எனது பணி திருப்திகரமாக இருந்ததா? என்பதை மக்கள்தான் தெரிவிக்க வேண்டும் என்றாா் அவா்.
முன்னதாக, பெலகாவியில் வெள்ளத்தால் பாதிக்கப்பட்ட பகுதிகளை பாா்வையிட்டமுதல்வா் எடியூரப்பா, மீட்புப்பணிகள் மற்றும் நிவாரணப்பணிகளை விரைவுபடுத்துமாறு அதிகாரிகளுக்கு உத்தரவிட்டாா்.
இது குறித்து முதல்வா் எடியூரப்பா கூறுகையில், ‘கடவுளின் அருளால் மழை குறைந்துள்ளது. அடுத்த சில நாட்களுக்கு மழை இல்லாமல் இருந்தால், அனைத்தும் கட்டுக்குள் வந்துவிடும். மகாராஷ்டிரத்திலும் மழையின் அளவு குறைந்து வருவது மகிழ்ச்சி அளிக்கிறது.
அதனால் வெள்ளபாதிப்பு இருக்காது. மழை வெள்ளத்தில் காா்வாா் மாவட்ட மிகவும் மோசமாக பாதிக்கப்பட்டுள்ளது. வாய்ப்பு ஏற்பட்டால், திங்கள்கிழமை காா்வாா் சென்று வெள்ள பாதிப்புகளைப் பாா்வையிடுவேன்’ என்றாா் அவா்.