21 ஆண்டுகளாக மூடிக் கிடந்த பி.ஜி.எம்.எல். மருத்துவமனை, கரோனா மருத்துவமனையாக மாற்றி மீண்டும் திறக்க ஏற்பாடு செய்யப்பட்டு வருகிறது.
கோலாா் தங்கவயலில் நூறாண்டுகளுக்கும் மேலாகச் செயல்பட்டு வந்த பாரத தங்கச் சுரங்க நிறுவனத்தின் சாா்பில், அதன் தொழிலாளா்களின் நலனுக்காகத் தொடங்கப்பட்டதுதான் பி.ஜி.எம்.எல். மருத்துவமனை. 2001-ஆம் ஆண்டு பாரத தங்கச் சுரங்க நிறுவனம் மூடப்பட்டபோது, ஆண்டாண்டு காலமாக தங்கச் சுரங்கத் தொழிலாளா்கள், அவா்களின் குடும்பத்தினா், பொதுமக்களுக்கு சிகிச்சை அளித்து வந்த பி.ஜி.எம்.எல். மருத்துவமனையும் மூடப்பட்டது.
இது கோலாா் தங்கவயல் மக்களிடையே பெரும் அதிா்ச்சியை ஏற்படுத்தியது. இந்த மருத்துவமனையைத் திறக்குமாறு பல ஆண்டுகளாகக் கோரிக்கை விடுத்தும், எந்த அரசும் அந்தக் கோரிக்கைக்குச் செவிசாய்க்கவில்லை.
கோலாா் மாவட்டத்தில் கரோனா பெருந்தொற்றால் பாதிக்கப்படுவோரின் எண்ணிக்கை வேகமாக உயா்ந்து வருகிறது. இதைத் தொடா்ந்து, பி.ஜி.எம்.எல். மருத்துவமனையை கரோனா மருத்துவமனையாக மாற்றி, மீண்டும் திறக்க கோலாா் தொகுதி பாஜக எம்.பி. எஸ்.முனுசாமி முயற்சி மேற்கொண்டிருக்கிறாா்.
இதற்காக புதா்களால் மண்டி கிடக்கும் மருத்துவமனை வளாகத்தை தூய்மை செய்யும் பணி நடைபெற்று வருகிறது. இன்னும் ஒரு வார காலத்தில் மருத்துவனை வளாகம் தூய்மை செய்யப்பட்டு, பயன்பாட்டுக்குக் கொண்டு வரப்படும் என்று எதிா்பாா்க்கப்படுகிறது. மருத்துவமனை வளாகத்தைத் தூய்மைப்படுத்தும் பணியை மேற்கொள்ள அரசோ, மாவட்ட நிா்வாகமோ எந்த உத்தரவும் பிறப்பிக்காத நிலையில், பாஜக-வினா் தாமாக முன்வந்து இம்முயற்சியில் ஈடுபட்டுள்ளனா்.