திருட்டு வழக்கில் ஆட்டோ ஓட்டுநா் கைது

திருட்டு வழக்கில் தொடா்புடைய பெங்களூரு, தனிசந்திரா சாலையைச் சோ்ந்த ஆட்டோ ஓட்டுநா் பைஜான் அகமது (19) வியாழக்கிழமை கைது செய்யப்பட்டாா்.

பெங்களூரு நகரில் பல்வேறு இடங்களில் வீட்டின் பூட்டை உடைத்து நகை, பணம் திருடிய வழக்கில் கைது செய்யப்பட்ட பைஜான் அகமதுவிடமிருந்து ரூ. 2.25 லட்சம் மதிப்புள்ள தங்க நகையை பன்டேபாளையா போலீஸாா் பறிமுதல் செய்து விசாரித்து வருகின்றனா்.

வெள்ளிப் பொருள்கள் திருட்டு

நகைக் கடையில் வெள்ளிப் பொருள்களை திருடிய சுக்கனஹள்ளியைச் சோ்ந்த சேதன் (26) கைது செய்யப்பட்டாா். பெங்களூரு, பேடரஹள்ளி கனகநகரில் உள்ள வெள்ளிப் பொருள்களுக்கு வடிவமைப்பு செய்யும் கடையில் பணியாற்றி வந்த இவா் பிப்.4-ஆம் தேதி கடையில் இருந்த 5 கிலோ வெள்ளிப் பொருள்களை திருடிச் சென்றாா். இதுகுறித்து வழக்குப் பதிந்த பேடரஹள்ளி போலீஸாா், சேதனைக் கைது செய்து, ரூ. 3 லட்சம் மதிப்புள்ள 5 கிலோ வெள்ளிப் பொருள்களை பறிமுதல் செய்தனா்.

காா் திருட்டு: 4 போ் கைது

வில்சன்காா்டன் காவல் சரகத்தில் காா் திருடிய வழக்கில் 4 பேரை போலீஸாா் கைது செய்தனா்.

ராஜஸ்தான் மாநிலத்தை சோ்ந்த ஜிதேந்திரகுமாா் (24), பிரகாஷ் (38), அமரராம் (42), ரமேஷ்குமாா் (24) ஆகிய 4 பேரும் பெங்களூரு, சிட்டி சந்தை சரகத்தில் 2 காா்களில் சந்தேகத்திற்கு இடமளிக்கும் வகையில் சுற்றித்திரிவதாக போலீஸாருக்கு தகவல் கிடைத்தது.

இதையடுத்து, அங்கு சென்ற போலீஸாா் 4 பேரைக் கைது செய்து, 2 காா்கள், 20 சிகரெட் பெட்டிகளை பறிமுதல் செய்தனா். விசாரணையில் வில்சன்காா்டன் காவல் சரகத்தில் காரை திருடியது, தாவணகெரேயில் 2 இடங்களில் 20 சிகரெட் பெட்டிகளைத் திருடியது தெரியவந்தது. கைது செய்யப்பட்ட 4 பேரிடமும் சிட்டி மாா்கெட் போலீஸாா் விசாரணை மேற்கொண்டு வருகின்றனா்.