முன்னாள் அமைச்சா் ரமேஷ் ஜாா்கிஹோளி மீதான பாலியல் புகாரில் தன்னை சிக்கவைக்க முயற்சி மேற்கொள்ளப்படுவதாக மாநில காங்கிரஸ் தலைவா் டி.கே.சிவக்குமாா் தெரிவித்தாா்.
இதுகுறித்து ஞாயிற்றுக்கிழமை செய்தியாளா்களிடம் அவா் கூறியதாவது:
முன்னாள் அமைச்சா் ரமேஷ் ஜாா்கிஹோளி, பாலியல் புகாா் தொடா்பாக வெளியிடப்பட்ட குறுந்தகடு போலியானது எனக் கூறியுள்ளாா். அது போலியானது எனக் கூறிய பின்னா், அதுதொடா்பான வழக்கை ஏன் பதிவு செய்துள்ளனா் என்பதனை விளக்க வேண்டும். ஒருசில அமைச்சா்கள் அச்சத்தால் தங்களைப்பற்றி எந்த செய்தியையும் வெளியிடக் கூடாது என நீதிமன்றம் சென்றுள்ளனா்.
பாஜக எம்.எல்.ஏ. பசவனகௌடா பாட்டீல் யத்னால், எம்.எல்.சி விஸ்வநாத் ஆகியோா் பாலியல் தொடா்பாக குறுந்தகடு குறித்து தொடா்ந்து பேசி வருகின்றனா். அதுதொடா்பாகவும் விசாரணை நடத்த வேண்டும். பாலியல் புகாா் வழக்கில் என்னை சம்பந்தப்படுத்த முயற்சி மேற்கொள்ளப்படுகிறது என்றாா்.