விவாதங்கள் இல்லாமல் சட்ட மசோதாக்கள் நிறைவேற்றப்படுவது சரியல்ல என்று மக்களவை தலைவா் ஓம் பிா்லா தெரிவித்தாா்.
கா்நாடக சட்டப் பேரவையில் வெள்ளிக்கிழமை நடந்த பேரவை மற்றும் மேலவை உறுப்பினா்கள் பங்கேற்ற கூட்டுக்கூட்டத்தில் கலந்துகொண்டு, ‘ஜனநாயகம்: நாடாளுமன்ற மாண்புகளைப் பாதுகாத்தல்’ என்ற தலைப்பில் அவா் பேசியது:
நமது நாட்டின் நாடாளுமன்றம் மற்றும் அனைத்து சட்டப் பேரவைகளில் ஒழுக்கம், கௌரவம், கண்ணியம் பராமரிக்கப்படுவதற்கான தேவை உள்ளது. நாடாளுமன்ற உறுப்பினா்கள், சட்டப் பேரவை உறுப்பினா்கள் தனிப்பட்ட முறையிலும், பொது வாழ்விலும் மக்களின் நன்மதிப்பைப் பெறுவதற்கு ஒழுக்கமான, கண்ணியமான நடத்தையை கடைப்பிடிக்க வேண்டும்.
இதுதொடா்பாக, 1992, 1997, 2001-ஆம் ஆண்டுகளில் கூட்டங்கள் நடத்தப்பட்டுள்ளன. இவற்றில் மக்களவைத் தலைவா்கள், பிரதமா்கள், முதல்வா்கள், நாடாளுமன்ற விவகாரங்கள்துறை அமைச்சா்கள், எதிா்க்கட்சித்தலைவா்கள் பங்கேற்றிருந்தனா். இந்தக் கூட்டத்தில் முக்கியமான பல தீா்மானங்கள் நிறைவேற்றப்பட்டுள்ளன. அவற்றை அமல்படுத்துவதற்கான காலம் கனிந்துள்ளது.
நாடாளுமன்றம், சட்டப் பேரவைகள், சட்ட மேலவைகளில் கூச்சல், குழப்பங்கள் காணப்படுவது ஜனநாயக மரபுக்கு எதிரானதாகும். இது மக்களுக்கு தவறான முன்னுதாரணமாக மாறிவிடும்.
ஜனநாயகத்தை பலப்படுத்த வேண்டிய அவசியம் ஏற்பட்டுள்ளது. மேலும் நாடாளுமன்ற மரபுகளைக் கட்டமைக்க வேண்டியுள்ளது. அப்போதுதான் மக்களின் பிரச்னைகளை நாடாளுமன்றம், சட்டப் பேரவைகளில் விவாதிக்க வாய்ப்பு ஏற்படும்.
ஜனநாயகத்தை பலப்படுத்தும் வகையில், சட்டப் பேரவைகளில் ஆக்கப்பூா்வமான விவாதங்கள் நடப்பதற்கான செயல்திட்டத்தை வகுப்பது தொடா்பாக விவாதிக்க வேண்டும்.
மக்களை மையப்படுத்தியதாக இருப்பதால், ஜனநாயகம்தான் சிறந்த ஆட்சி முறையாகக் கருதப்படுகிறது. தோ்தல்கள் மூலம் வாக்காளா்கள் பங்காற்றுவது, ஜனநாயகத்தின் மீது மக்கள் வைத்துள்ள நம்பிக்கையை வெளிப்படுத்துகிறது. ஜனநாயக அமைப்புகள், மக்களுக்கு பதிலளிக்கும் வகையில் மாற்றுவது எப்படி என்பது குறித்து விவாதங்கள் நடத்தப்பட வேண்டும். இந்திய ஜனநாயகத்தின் ஆன்மாவான நாடாளுமன்றமும், சட்டப் பேரவைகளும் மக்களின் நன்மைக்கு முக்கியத்துவம் அளித்தால்தான் ஜ னநாயக அமைப்புகள் பலம்பெறும்.
நாடாளுமன்ற, சட்டப் பேரவை உறுப்பினா்களின் திறன் மேம்பாட்டுக்கு முக்கியத்துவம் அளிக்க வேண்டும். சட்டத்தை நிறைவேற்ற விவாதங்கள் தேவை. ஆனால், விவாதங்கள் எதுவும் நடக்காமல் சட்டமசோதாக்கள் நிறைவேற்றப்படுகின்றன. இது சரியல்ல. சட்டப்பேரவையின் நடவடிக்கைகளில் உறுப்பினா்கள் ஆா்வமாகப் பங்காற்றினால்தான், சட்டமியற்றும்போது விவாதங்களில் பங்கேற்க முடியும்.
நாடு மகிழ்ச்சியாகவும், வளமாகவும் இருக்க நாம் அனைவரும் ஒன்றிணைந்து செயல்பட வேண்டியது அவசியம். நாடாளுமன்ற ஜனநாயகத்தை பலப்படுத்துவது, மக்களின் சமூக-பொருளாதார வாழ்க்கையில் மாற்றங்களுக்கு வித்திடும் என்றாா்.
அவை புறக்கணிப்பு: இந்தக் கூட்டத்தை காங்கிரஸ் புறக்கணித்தது. அதனால் அக்கட்சியைச் சோ்ந்த உறுப்பினா்கள் யாரும் அவையில் இல்லை.
இது குறித்து காங்கிரஸ் மாநிலத்தலைவா்டி.கே.சிவக்குமாா்கூறுகையில், ‘கா்நாடக சட்டப் பேரவைக்கும் மக்களவைத் தலைவா் ஓம் பிா்லாவுக்கும் சம்பந்தமில்லை என்பதை ஏற்கெனவே தெரிவித்துள்ளோம். ஓம் பிா்லாவைப் பேசவைப்பதன் மூலம் தவறான முன்னுதாரணத்தை உருவாக்குகிறாா்கள். பேரவை கூட்டுக்கூட்டத்தில் பேசுவதற்கு மக்களவைத் தலைவருக்கு அரசியலமைப்புச்சட்டம் அனுமதி அளிக்கவில்லை. பேரவைத் தலைவா், மேலவைத் தலைவா் இருவரும் தத்தமது அலுவலகங்களில் வைத்து மக்களவைத் தலைவா் ஓம் பிா்லாவோடு பேச வேண்டும். மூன்று பேரும் சோ்ந்து அரசியல் நடத்துகிறாா்கள். இதற்கு அரசும் ஒத்துழைத்துள்ளது. இது நல்லதல்ல. அதற்கு எதிா்ப்பு தெரிவித்து கூட்டத்தைப் புறக்கணித்துள்ளோம்’ என்றாா்.
கூட்டுக் கூட்டத்தில் பேரவைத் தலைவா் காகேரி பேசுகையில், ‘கூட்டுக்கூட்டத்தை காங்கிரஸ் உறுப்பினா்கள் புறக்கணித்துள்ளது வேதனை அளிக்கிறது’ என்றாா்.