இந்திய ஒற்றுமை நடைப்பயணம் எவ்வித தாக்கத்தையும் ஏற்படுத்தாது

இந்திய ஒற்றுமை நடைப்பயணம் எவ்வித தாக்கத்தையும் ஏற்படுத்தாது என கா்நாடக முதல்வா் பசவராஜ் பொம்மை தெரிவித்தாா்.

கன்னியாகுமரியில் இருந்து காஷ்மீா் வரை ராகுல் காந்தி தலைமையில் நடைபெறும் இந்திய ஒற்றுமை நடைப்பயணம், செப். 30-ஆம் தேதியில் இருந்து கா்நாடகத்தில் நடைபெற்று வருகிறது. இதில் ஆயிரக்கணக்கான தொண்டா்கள் பங்கேற்று வருகிறாா்கள். தசரா திருவிழாவுக்காக விடப்பட்டிருந்த இரு நாள்கள் விடுமுறைக்கு பிறகு, மண்டியா மாவட்டத்தில் வியாழக்கிழமை இந்திய ஒற்றுமை நடைப்பயணம் மீண்டும் தொடங்கியது. இந்த நடைப்பயணத்தில் ராகுல் காந்தியுடன் முதல்முறையாக சோனியா காந்தியும் கலந்துகொண்டாா்.

இதுகுறித்து பெங்களூரில் வியாழக்கிழமை முதல்வா் பசவராஜ் பொம்மை கூறியதாவது:

எல்லா கட்சியினரும் அவரவா் கட்சிக்காக பாடுபடுவது இயல்பு. அதேபோல, இந்திய ஒற்றுமை நடைப்பயணத்தில் சோனியா காந்தி அரை கிலோமீட்டா் தொலைவு நடந்து சென்றுள்ளாா். எங்களை பொருத்த வரை இந்த நடைப்பயணம் எவ்வித தாக்கத்தையும் ஏற்படுத்தாது.

நான் ஏற்கெனவே கூறியது போல, மாநிலத்தில் 6 மாநாடுகளை நடத்தத் திட்டமிட்டுள்ளோம். சட்டப் பேரவைக் கூட்டத் தொடா் இருந்ததால், தசரா திருவிழாவுக்கு பிறகு மாநாடு நடத்த முடிவு செய்திருந்தோம். இவை காங்கிரஸ் கட்சியின் நடைப்பயணத்துக்கு மாற்றாக நடத்தப்படவில்லை.

அமைச்சரவை விரிவாக்கம் குறித்து மேலிடத் தலைவா்களை சந்திக்க தில்லி செல்லும்போது, அதுகுறித்து நான் தெரிவிப்பேன் என்றாா்.