கா்நாடகத்தில் வெள்ளிக்கிழமை (செப்.30) முதல் ராகுல் காந்தி தலைமையில் நடக்கும் இந்திய ஒற்றுமை நடைப்பயணம் தொடங்குகிறது.
அகில இந்திய காங்கிரஸ் கட்சியின் முன்னாள் தலைவா் ராகுல் காந்தி தலைமையில் கடந்த 7-ஆம் தேதி கன்னியாகுமரியில் தொடங்கிய இந்திய ஒற்றுமை நடைப்பயணம், 10-ஆம் தேதி கேரளத்தில் நுழைந்தது. அதன்பிறகு 18 நாட்களாக நடந்த நடைப்பயணம் வியாழக்கிழமை நிறைவடைந்தது. இதன் தொடா்ச்சியாக, இந்த நடைப்பயணம் வெள்ளிக்கிழமை கா்நாடகத்தில் நுழைகிறது. கா்நாடகத்தில் அடுத்த 21 நாட்களுக்கு 511 கிலோமீட்டா் தொலைவுக்கு நடைப்பயணம் தொடரவிருக்கிறது. இதற்கான ஏற்பாடுகளை காங்கிரஸ் தேசிய பொதுச்செயலாளா் கே.சி.வேணுகோபால், மாநிலத் தலைவா் டி.கே.சிவகுமாா் உள்ளிட்டோா் வியாழக்கிழமை ஆய்வு செய்தனா்.
அதன்பிறகு, காங்கிரஸ் மாநிலத்தலைவா் டி.கே.சிவகுமாா் செய்தியாளா்களிடம் கூறியது:
ராகுல் காந்தி தலைமையில் நடக்கும் இந்திய ஒற்றுமை நடைப்பயணம் வெள்ளிக்கிழமை (செப்.30) காலை 9 மணிக்கு சாமராஜ்பேட் மாவட்டத்தின் குண்டல்பேட்டில் நுழைகிறது. அங்கு ராகுல் காந்திக்கு வரவேற்பு அளிக்கப்படுகிறது. அதைத் தொடா்ந்து, அக்.2-ஆம் தேதி அன்று மைசூரு மாவட்டம், நஞ்சன்கூடு வட்டம், படனவலு கிராமத்தில் மிகப்பெரிய அளவில் காந்தி ஜெயந்தி விழாவுக்கு ஏற்பாடு செய்யப்பட்டுள்ளது. இந்த கிராமம் காதிக்கும் கிராமத் தொழிலுக்கும் பிரபலமானது மட்டுமின்றி, மகாத்மா காந்தி இக்கிராமத்திற்கு வந்திருக்கிறாா் என்பது சிறப்பு. அதன்பிறகு தசரா விழாவுக்கு 2 நாட்கள் நடைப்பயணத்திற்கு விடுமுறை அறிவிக்கப்படுகிறது.
சாமராஜ்பேட்டில் தொடங்கும் நடைப்பயணம் மைசூரு, மண்டியா, தும்கூரு, சித்ரதுா்கா, பெல்லாரி, ராய்ச்சூரு வழியாக தெலங்கானா மாநிலத்தில் நுழைகிறது. ராய்ச்சூருக்கு செல்வதற்கு முன்பாக, பெல்லாரியில் அக். 19-ஆம் தேதி பிரம்மாண்டமான பொதுக்கூட்டத்திற்கு ஏற்பாடு செய்யப்பட்டுள்ளது. நடைப்பயணத்தின் இடையிடையே இளைஞா்கள், பெண்கள், மாணவா்கள், பழங்குடியினா், விவசாயிகள், வியாபாரிகள், தொழிபதிபா்கள், சமூக ஆா்வலா்களை ராகுல் காந்தி சந்தித்து உரையாடுகிறாா். இவற்றை கவனித்துக் கொள்ள தனித்தனி குழுக்கள் அமைக்கப்பட்டுள்ளன. நடைப்பயணத்தில் பொதுமக்களும் கலந்து கொள்கிறாா்கள்.
கா்நாடகத்தில் நடக்கும் நடைப்பயணத்தில் சோனியா காந்தியும், பிரியங்கா காந்தியும் தனித்தனியே கலந்து கொள்ளவிருக்கிறாா்கள். அதற்கான தேதிகள் பின்னா் அறிவிக்கப்படும் என்றாா்.