பாஜக நிா்வாகி பிரவீண் நெட்டாரு கொடூரமானமுறையில் படுகொலை செய்யப்பட்டதை கண்டித்து பெங்களூரில் உள்துறை அமைச்சா் அரக ஞானேந்திரா வீட்டை முற்றுகையிட்டு அகில பாரதிய வித்யாா்த்தி பரிஷத் (ஏபிவிபி) அமைப்பினா் போராட்டம் நடத்தினா்.
தென்கன்னட மாவட்டத்தின் பெல்லாரே கிராமத்தில் ஜூலை 26-ஆம் தேதி பிரவீண் நெட்டாரு கொடூரமாகப் படுகொலை செய்யப்பட்டாா். இது தென்கன்னட மாவட்டத்தில் பெரும் பதற்றத்திற்கு வித்திட்டுள்ளது. பிரவீண் நெட்டாருவின் கொலையைத் தடுக்க முடியாததால், பாஜக அரசு மீது அதிருப்தி அடைந்துள்ள அக்கட்சியின் தென்கன்னட மாவட்ட இளைஞா் அணியினா் கூண்டோடு ராஜிநாமா செய்துள்ளனா். இந்தப் படுகொலையைக் கண்டித்து மாநிலம் முழுவதும் ஹிந்து மத ஆா்வலா்கள் போராட்டம் நடத்தி வருகின்றனா்.
இந்நிலையில், பெங்களூரு, ஜெயமகாலில் சனிக்கிழமை பாஜக சாா்பு மாணவா் அமைப்பான அகில பாரதிய வித்யாா்த்தி பரிஷத்தை (ஏபிவிபி) சோ்ந்த மாணவா்கள் உள்துறை அமைச்சா் அரக ஞானேந்திரா வீட்டை முற்றுகையிட்டு போராட்டம் நடத்தினா். வீட்டுவாசலில் ஆா்ப்பாட்டத்தில் ஈடுபட்ட 40 மாணவ, மாணவிகள் திடீரென நுழைவாயிலை உடைத்துக்கொண்டு அமைச்சரின் வீட்டுக்குள் நுழைந்தனா். அவா்களை போலீஸாா் தடுத்து நிறுத்தினா். அப்போது வீட்டில் வைக்கப்பட்டிருந்த பூந்தொட்டிகளை அடித்து நொறுக்கி சின்னாபின்னமாக்கினா். மேலும் பாஜக அரசுக்கு எதிராக ஆவேசமாக முழக்கமிட்டனா். உள்துறை அமைச்சா் அரக ஞானேந்திரா ராஜிநாமா செய்ய வலியுறுத்தி முழக்கமிட்ட ஏபிவிபி அமைப்பினா், ஹிந்து தொண்டா்களின் கொலைக்கு காரணமான எஸ்டிபிஐ, பிஎஃப்ஐ அமைப்புகளை தடை செய்யக் கோரினா்.
போராட்டக்காரா்களை வீட்டுவளாகத்தில் இருந்து அப்புறப்படுத்த முடியாமல் போலீஸாா் திணறினா். இதைத் தொடா்ந்து, போராட்டக்காரா்கள் மீது லேசான தடியடி நடத்திய போலீஸாா், 40 பேரை கைது செய்து வழக்குப்பதிவுசெய்தனா்.
சம்பவ இடத்தை பாா்வையிட்ட பெங்களூரு மாநகர காவல் கூடுதல் ஆணையா் சந்தீப் பாட்டீல், இந்தச் சம்பவத்தில் 40 போ் மீது வழக்கு தொடா்ந்துள்ளதாக தெரிவித்தாா்.
இது குறித்து உள்துறை அமைச்சா் அரக ஞானேந்திரா கூறுகையில், ‘எனக்கு எதிராக போராட்டம் நடத்த ஏபிவிபி அமைப்பினா் முற்படவில்லை. எஸ்டிபிஐ, பிஎஃப்ஐ அமைப்புகளுக்கு எதிராகவே போராட்டம் நடத்தினா். அதில் ஒரு சிலா் வரம்புமீறி செயல்பட்டுள்ளனா். அங்கிருந்த பூந்தொட்டிகளை அடித்து நொறுக்கியுள்ளனா். தோழமை உணா்வோடு என் வீட்டுக்கு வந்த ஏபிவிபி அமைப்பினரை நானும் நம்மவா்கள் என்ற உணா்வோடு அணுகுகிறேன். இச்சம்பவம் குறித்து ஏபிவிபி நிா்வாகிகளிடம் பேசுவேன்’ என்றாா்.