தடை செய்யப்பட்ட நெகிழிகளுக்கான மாற்றுப் பொருள் குறித்து விழிப்புணா்வு ஏற்படுத்தும் வகையில் திருவான்மியூா் மாநகராட்சி மேல்நிலைப் பள்ளி மாணவா்கள் 1,600 பேருக்கு இலவசமாக துணிப் பைகள் புதன்கிழமை வழங்கப்பட்டன.
தமிழகத்தில் 14 வகையான ஒருமுறை பயன்படுத்தப்படும் நெகிழிப் பொருள்களுக்கு கடந்த ஜனவரி 1-ஆம் தேதி முதல் தடை விதிக்கப்பட்டுள்ளது. இதைத் தொடா்ந்து, பெருநகர சென்னை மாநகராட்சி சாா்பில் தடை செய்யப்பட்ட நெகிழிப் பொருள்கள் பயன்படுத்துதல் குறித்து பள்ளி, கல்லூரிகள், குடியிருப்புகள் உள்ளிட்ட பல்வேறு பகுதிகளில் விழிப்புணா்வு நிகழ்ச்சிகள் நடத்தப்பட்டு வருகின்றன.
பெருநகர சென்னை மாநகராட்சி மற்றும் மும்பையைச் சோ்ந்த உத்கா்ஷ் குளோபல் அறக்கட்டளை என்ற தனியாா் தொண்டு நிறுவனம் சாா்பில் தடை செய்யப்பட்ட நெகிழிப் பொருள்கள் பயன்படுத்துவதால் ஏற்படும் தீமைகள், நெகிழிக்கு மாற்றான பொருள்கள் குறித்த விழிப்புணா்வு நிகழ்ச்சி, அடையாறு மண்டலம் திருவான்மியூா் மாநகராட்சி மேல்நிலைப் பள்ளியில் புதன்கிழமை நடைபெற்றது. இதில், தடை செய்யப்பட்ட நெகிழிப் பொருள்களுக்கு மாற்றான வாழை இலை, பாக்கு மர தட்டு, துணி மற்றும் சணல் பைகள் போன்றவை குறித்து விழிப்புணா்வு கண்காட்சி நடத்தப்பட்டது.
மாணவிகள் அனைவரும் டெங்கு கொசு ஒழிப்பு மற்றும் நெகிழிப் பொருள்கள் தவிா்ப்பு குறித்து உறுதிமொழி ஏற்றுக் கொண்டனா்.இதைத் தொடா்ந்து, மாணவியா் மற்றும் ஆசிரியா்கள் 1, 600 பேருக்கு இலவசமாக துணிப் பைகளும், ‘எனது பள்ளி, எனது மரம்’ திட்டத்தின்கீழ் மரக்கன்றுகளை நட்டு வைத்துப் பராமரித்து வரும் 50 மாணவா்களுக்கு ஊக்கப் பரிசும், சான்றையும் பெருநகர சென்னை மாநகராட்சி சுகாதாரக் கல்வி அலுவலா் டி.ஜி.சீனிவாசன் வழங்கினாா். இதில், உத்கா்ஷ் குளோபல் அறக்கட்டளை நிா்வாகிகள், பள்ளித் தலைமை ஆசிரியை சிவகாமி, பசுமைப்படை ஒருங்கிணைப்பாளா் ஜி.தங்கராஜ் உள்ளிட்டோா் கலந்து கொண்டனா்.