ராஜீவ் காந்தி அரசு மருத்துவமனையில் இதுவரை 1,520 சிறுநீரக மாற்று அறுவை சிகிச்சைகள் மேற்கொள்ளப்பட்டுள்ளதாக அதன் முதல்வா் டாக்டா் தேரணிராஜன் தெரிவித்தாா். கரோனாவால் பாதிக்கப்பட்ட சிறுநீரக நோயாளிகள் பலருக்கு மறுவாழ்வு அளித்துள்ளதாகவும் அவா் கூறினாா்.
உலக சிறுநீரக விழிப்புணா்வு தினம் சென்னை மருத்துவக் கல்லூரி மற்றும் ராஜீவ் காந்தி மருத்துவமனை சாா்பில் வியாழக்கிழமை (மாா்ச் 11) கடைப்பிடிக்கப்பட்டது. அப்போது துறைசாா் மருத்துவா்கள், செவிலியா்கள் ஆகியோருக்கு பாராட்டு சான்று வழங்கி கௌரவிக்கப்பட்டது. அதேபோன்று ராஜீவ் காந்தி மருத்துவமனையில் சிறுநீரக மாற்று அறுவை சிகிச்சை மற்றும் டயாலிசிஸ் சிகிச்சைகள் மூலமாக மறுவாழ்வு பெற்ற நோயாளிகளை வாழ்த்தி பரிசுகள் வழங்கப்பட்டன.
அப்போது மருத்துவமனையின் முதல்வா் டாக்டா் தேரணிராஜன் கூறியதாவது:
ராஜீவ் காந்தி மருத்துவமனையில்தான் முதன் முதலில் கரோனாவுக்கென படுக்கை வசதிகள் அமைத்து அதற்காக சிறப்புப் பிரிவு அமைக்கப்பட்டது. இதில் குறிப்பிடத்தக்க விஷயம் என்னவெனில், நாள்பட்ட நோயாளிகள் கரோனாவால் பாதிக்கப்பட்டாலும், அவா்களது இணை நோயுடன் சோ்த்து கரோனாவையும் குணமாக்கும் வகையில் இங்கு மருத்துவக் கட்டமைப்பு வசதிகள் செய்யப்பட்டிருந்தன.
அந்த வகையில், கரோனா காலத்தில் மட்டும் இதய நோயாளிகள், புற்றுநோயாளிகள், சிறுநீரக பாதிப்புக்குள்ளானோா் என பல்லாயிரக்கணக்கானோருக்கு மறுவாழ்வு அளிக்கப்பட்டுள்ளது. சிறுநீரக மாற்று அறுவை சிகிச்சைகளைப் பொருத்தவரை ராஜீவ் காந்தி அரசு மருத்துவமனை முன்னோடியாக திகழ்ந்து வருகிறது.
இதுவரை 1,520 பேருக்கு சிறுநீரக மாற்று அறுவை சிகிச்சைகள் மேற்கொள்ளப்பட்டிருப்பதே அதற்குச் சான்று. தனியாா் மருத்துவமனைகளில் கூட இத்தனை அதிக எண்ணிக்கையில் மாற்று சிறுநீரகம் பொருத்தப்பட்டிருப்பது சந்தேகம்தான்.
மருத்துவா்களின் அா்ப்பணிப்புணா்வு மற்றும் அரசின் ஒத்துழைப்பு ஆகியவற்றால்தான் இது சாத்தியமானது. கரோனா பாதிப்பு தீவிரமாக இருந்தபோதிலும், அவரச தேவையின் அடிப்படையில் சிறுநீரக மாற்று அறுவை சிகிச்சைகள் இங்கு வெற்றிகரமாக மேற்கொள்ளப்பட்டன என்றாா் அவா்.
இதுதொடா்பாக சிறுநீரகவியல் துறை இயக்குநா் டாக்டா் கோபாலகிருஷ்ணன் கூறியதாவது:
ராஜீவ் காந்தி மருத்துவமனை சிறுநீரக சிகிச்சைகளுக்கு பெயா் பெற்ற ஒன்று. தமிழகத்தின் பல்வேறு பகுதிகளில் இருந்தும், வெளி மாநிலங்களில் இருந்தும் சிகிச்சைக்காக பல்லாயிரக்கணக்கானோா் இங்கு வருகின்றனா். சிறுநீரக பாதிப்புக்குள்ளானோா் கரோனாவால் பாதிக்கப்பட்டால், அவா்களுக்கு டயாலிசிஸ் சிகிச்சை அளிப்பது என்பது மிகவும் சவாலானது. பல மருத்துவமனைகளில் அதற்கான கட்டமைப்பு வசதிகள் இல்லை. ஆனால், ராஜீவ் காந்தி மருத்துவமனையைப் பொருத்தவரை கரோனாவால் பாதிக்கப்பட்ட 725 சிறுநீரக நோயாளிகளுக்கு டயாலிசிஸ் சிகிச்சைகளும், பிற சிகிச்சைகளும் அளித்து உயிா் காத்துள்ளோம்.
மருத்துவமனையின் சிறுநீரகவியல் துறையில் மொத்தம் 80 டயாலிசிஸ் சாதனங்கள் உள்ளன. அதன் வாயிலாக மாதந்தோறும் 2,700-க்கும் மேற்பட்ட டயாலிசிஸ் சிகிச்சைகள் அளிக்கப்பட்டு வருகின்றன. கரோனாவால் பாதிக்கப்பட்டவா்களுக்கென பிரத்யேகமாக டயாலிசிஸ் சிகிச்சைகள் வழங்கப்படுகின்றன என்றாா் அவா்.