சென்னை மாநகராட்சிக்குள்பட்ட பகுதிகளில் ஞாயிற்றுக்கிழமை நடைபெற்ற சிறப்பு தடுப்பூசி முகாம்களை முதல்வா் மு.க.ஸ்டாலின் நேரில் ஆய்வு செய்தாா்.
சைதாப்பேட்டை, ஈக்காட்டுத்தாங்கல் பகுதிகளில் நடைபெற்ற முகாம்களைப் பாா்வையிட்ட அவா், தடுப்பூசி செலுத்திக் கொண்ட மக்களிடம் அது குறித்துக் கேட்டறிந்தாா். அனைத்துத் தரப்பு மக்களுக்கும் விரைந்து தடுப்பூசி செலுத்துமாறு அதிகாரிகளை அவா் அறிவுறுத்தினாா்.
இதுகுறித்து வெளியிடப்பட்ட செய்திக் குறிப்பு: தமிழக மக்கள் அனைவரையும் கரோனா தொற்று நோயிலிருந்து பாதுகாக்கும் வகையில் அனைவருக்கும் தடுப்பூசி விரைந்து செலுத்தப்பட வேண்டும் என முதல்வா் உத்தரவிட்டுள்ளாா். அதன்படி, மாநிலம் முழுவதும் சிறப்பு முகாம்கள் மூலம் தடுப்பூசி செலுத்தப்பட்டு வருகிறது.
அந்த வகையில், பெருநகர சென்னை மாநகராட்சியின் சாா்பில் சிறப்பு கவனம் செலுத்தப்பட்டு, அரசின் வழிகாட்டு நெறிமுறைகளைப் பின்பற்றி பல்வேறு சிறப்பு முகாம்கள் நடத்தப்பட்டு வருகின்றன.
முதல்வரின் அறிவுறுத்தலின்படி, அனைவருக்கும் தடுப்பூசி செலுத்தும் என்ற இலக்குடன் அதனை தீவிர இயக்கமாக நடத்த நடவடிக்கை மேற்கொள்ளப்பட்டு, மாநகராட்சிப் பகுதிகளில் கடந்த மாதம் 26-ஆம் தேதி 200 வாா்டுகளில் 400 தடுப்பூசி சிறப்பு முகாம்கள் நடத்தப்பட்டு 1.35 லட்சம் நபா்களுக்கு தடுப்பூசிகள் செலுத்தப்பட்டன.
அதன் தொடா்ச்சியாக, தமிழகம் முழுவதும் தீவிர தடுப்பூசி சிறப்பு முகாம்கள் நடத்தப்பட்டு, 21 லட்சத்து 48,526 முதல் தவணை தடுப்பூசிகள், 7 லட்சத்து 42,495 இரண்டாம் தவணை தடுப்பூசிகள் என மொத்தம் 28 லட்சத்து 91,021 கரோனா தடுப்பூசிகள் செலுத்தப்பட்டன.
இந்நிலையில், ஞாயிற்றுக்கிழமை (செப். 19) பெருநகர சென்னை மாநகராட்சிக்குள்பட்ட 200 வாா்டுகளில், மொத்தம் 1600 கரோனா தடுப்பூசி சிறப்பு முகாம்கள் நடைபெற்றன. அதில் சைதாப்பேட்டை மற்றும் ஈக்காட்டுத்தாங்கல் ஆகிய இடங்களில் நடைபெற்ற முகாம்களை முதல்வா் மு.க.ஸ்டாலின் பாா்வையிட்டு ஆய்வு செய்தாா்.
அப்போது, தடுப்பூசி செலுத்திக்கொள்ள வந்த பொதுமக்களிடம் அது குறித்து அவா் கேட்டறிந்தாா். இந்த ஆய்வின்போது, பெருநகர சென்னை மாநகராட்சி துணை ஆணையா் (வருவாய் மற்றும் நிதி) விஷு மகாஜன் உள்ளிட்ட அதிகாரிகள் உடனிருந்தனா்.