விநாயகா் சதுா்த்தியையொட்டி, இந்து அமைப்புகள் உள்ளிட்ட பல்வேறு அமைப்புகள் சாா்பில் சென்னையில் சுமாா் 2,500 சிலைகள் புதன்கிழமை (ஆக.31) பிரதிஷ்டை செய்யப்படுகின்றன.
இதையொட்டி, நகா் முழுவதும் 15,000 போலீஸாா் பாதுகாப்பு பணியில் ஈடுபடுகின்றனா். பதற்றமான பகுதிகளில் துப்பாக்கி ஏந்திய போலீஸாா் பாதுகாப்பு பணியில் ஈடுபடுகின்றனா்.
விநாயகா் சதுா்த்தி புதன்கிழமை (ஆகஸ்ட் 31) கொண்டாடப்படுகிறது. இதையொட்டி, இந்து அமைப்புகளின் சாா்பில் விநாயகா் சிலைகள் பிரதிஷ்டை செய்வதற்கு ஏற்பாடுகள் செய்யப்பட்டு வருகின்றன. இதற்காக கடந்த பல வாரங்களாக விநாயகா் சிலைகள் தயாா் செய்யும் பணியில் மண்பாண்ட கலைஞா்கள் ஈடுபட்டிருந்தனா். கடந்த சில நாள்களாக விநாயகா் சிலைகள், பிரதிஷ்டை செய்யப்படும் இடங்களுக்கு, அனுப்பி வைக்கும் பணியில் இந்து அமைப்பு நிா்வாகிகள் ஈடுபட்டு வந்தனா்.
சென்னையில் இந்து முன்னணி, விசுவ ஹிந்து பரிஷத், சிவசேனை, இந்து மக்கள் கட்சி, பாரதிய ஜனதா கட்சி, ஆா்.எஸ்.எஸ். உள்ளிட்ட 65 அமைப்புகள் விநாயகா் சிலைகளை வைப்பதற்குரிய ஏற்பாடுகளை செய்து வருகின்றன. இந்த அமைப்புகள் தவிா்த்து குடியிருப்பு சங்கங்கள்,சமூக நல அமைப்புகள் ஆகியவையும் விநாயகா் சிலைகளை பிரதிஷ்டை செய்வதற்குரிய ஏற்பாடுகளை செய்து வருகின்றன.
விநாயகா் சிலைகளை பிரதிஷ்டை செய்வதற்கு காவல்துறையிடம் இந்து அமைப்பினா் முறைப்படி அனுமதி பெற்று வருகின்றனா். சென்னை பெருநகர காவல்துறை,தாம்பரம், ஆவடி மாநகர காவல்துறை ஆகியவற்றுக்கு உட்பட்ட பகுதிகளில் சுமாா் 2,500 சிலைகள் பிரதிஷ்டை செய்வதற்கு காவல்துறையால் அனுமதி வழங்கப்பட்டுள்ளதாக கூறப்படுகிறது. செவ்வாய்க்கிழமை இரவு வரை விநாயகா் சிலைகள் பிரதிஷ்டை செய்வதற்கு அனுமதி வழங்கப்பட்டு வந்ததால், 3 காவல்துறைகளிலும் விநாயகா் சிலைகளின் எண்ணிக்கை இறுதி செய்யமுடியாத நிலை ஏற்பட்டது.
காவல்துறை கட்டுப்பாடு:
அதேவேளையில், அனுமதி பெற்ற இடத்திலேயே விநாயகா் சிலையை வைக்க வேண்டும், ஒலி பெருக்கிகளை அனுமதிக்கப்பட்ட நேரம் மட்டுமே பயன்படுத்த வேண்டும், சிலைகள் பிரதிஷ்டை செய்யப்படும் இடத்தில் எளிதில் தீப்பற்றக் கூடிய பொருள்கள் இருக்கக் கூடாது, சிலைகளை பாதுகாக்க விழாக்குழு சாா்பில் சிலைகள் பாதுகாப்புக் குழு அமைக்கப்பட வேண்டும் என காவல் துறை சாா்பில் உள்பட பல்வேறு விதிமுறைகள் விதிக்கப்பட்டிருந்தன. இந்த விதிமுறைக்கு உட்பட்டாலே சிலைகள் பிரதிஷ்டை செய்யப்படுவதற்கு காவல்துறையால் அனுமதி வழங்கப்படுகிறது.
விநாயகா் சிலைகள், புதன்கிழமை காலை தொடங்கி மாலை வரை இந்து அமைப்பினரால் பிரதிஷ்டை செய்யப்படுகின்றன. பிரதிஷ்டை செய்யப்படும் சிலைகளுக்கு போலீஸ் பாதுகாப்பு வழங்கப்படுகிறது. இதில் பதற்றமான பகுதிகளில் பிரதிஷ்டை செய்யப்படும் சிலைகளுக்கு, துப்பாக்கி ஏந்திய போலீஸ் பாதுகாப்பு வழங்கப்படுகிறது. அதேபோல பிரதிஷ்டை செய்யப்படும் ஒவ்வொரு சிலைக்கும், அமைக்கப்பட்டிருக்கும் பாதுகாப்பு குழுவினரும், சிலை பாதுகாப்பு பணியில் ஈடுபடுகின்றனா்.
சிலைகள் கரைப்பு:
பெரும்பாலான விநாயகா் சிலைகள் செப்டம்பா் 4-ஆம் தேதி கடலில் கரைக்கப்படுகின்றன. இந்து முன்னணி சாா்பில் பிரதிஷ்டை செய்யப்படும் விநாயகா் சிலைகள், அன்றைய தினம் ஊா்வலமாக கொண்டு வரப்பட்டு கடலில் கரைக்கப்படுகின்றன. இதில் 4-ஆம் தேதி மட்டும் சுமாா் 2 ஆயிரம் விநாயகா் சிலைகள் கடலில் கரைக்கப்படுவதற்கான ஏற்பாடுகள் செய்யப்பட்டு வருவதாக காவல்துறையினா் தெரிவித்தனா்.
பட்டினப்பாக்கம் சீனிவாசபுரம், நீலாங்கரை பல்கலை நகா், காசிமேடு மீன்பிடி துறைமுகம், எண்ணூா் ராமகிருஷ்ணாநகா், திருவொற்றியூா் பாப்புலா் எடை உள்ளிட்ட பகுதிகளில் சிலைகள் கரைப்பதற்கான ஏற்பாடுகளை காவல் துறை செய்து வருகிறது.
சிலைகளை கரைப்பதற்காக ராட்சத கிரேன்கள் கொண்டு வரப்படுகின்றன. மேலும், சிலை கரைப்பின்போது அசம்பாவித சம்பவங்கள் நடைபெறாமல் தடுப்பதற்கு, அந்தப் பகுதி முழுவதும் கண்காணிப்பு கேமராகள் பொருத்தப்படுகின்றன. அதேபோல சிலைகளை கரைக்கும் பகுதியில் ஆளில்லாத டிரோன்கள் மூலம் கண்காணிக்கப்படுகிறது.
15,000 போலீஸாா் பாதுகாப்பு:
விநாயகா் சதுா்த்தியையொட்டி, சென்னையில் பலத்த பாதுகாப்பு ஏற்பாடுகள் செய்யப்பட்டுகின்றன. பாதுகாப்பு ஏற்பாடுகள் பெருநகர காவல் ஆணையா் சங்கா் ஜிவால் தலைமையில் செய்யப்பட்டுள்ளது. பாதுகாப்பு பணியை கூடுதல் ஆணையா்கள் டி.எஸ்.அன்பு,,பிரேம் ஆனந்த் சின்ஹா ஆகியோா் கண்காணிக்கின்றனா்.
உதவி ஆணையா்கள்,காவல் ஆய்வாளா்கள்,உதவி ஆய்வாளா்கள் உள்பட மொத்தம் 15,000 போலீஸாா் பாதுகாப்புப் பணியில் ஈடுபடுகின்றனா். கடலில் சிலைகள் கரைக்கப்படும் நாள்களில்,மேலும் போலீஸாா் பாதுகாப்புக்காக வெளி மாவட்டங்களில் இருந்து வரவழைக்கப்படுகின்றனா்.
விநாயகா் சிலை ஊா்வலம் அனுமதிப்பட்ட வழியிலேயே செல்ல வேண்டும், ஊா்வலம் அனுமதிக்கப்பட்ட நேரத்தில் கரைக்கும் இடத்தை சென்றடைய வேண்டும் உள்ளிட்ட பல்வேறு விதிமுறைகளை காவல்துறையினா் விதித்துள்ளனா். விநாயகா் சதுா்த்தி பாதுகாப்பு பணிக்காக, போலீஸாா் முழு அளவில தயாா் நிலையில் வைக்கப்பட்டுள்ளனா்.