சென்னை ஆா்.ஏ.புரம் ஆக்கிரமிப்பு அகற்றல் விவகாரத்தில் நீதிமன்றம் பிறப்பித்த உத்தரவு விரைந்து செயல்படுத்தப்பட வேண்டும் என்றும், இந்த விவகாரத்தில் தொடா்புடைய குடியிருப்பாளா்களுக்கு ஏதேனும் குறைபாடுகள் இருந்தால் உள்ளூா் அரசு அதிகாரிகளிடம் முறையிடலாம் என்றும் உச்சநீதிமன்றம் செவ்வாய்க்கிழமை தெரிவித்தது.
இதுதொடா்புடைய மனு உச்சநீதிமன்றத்தில் நீதிபதி ஏ.எம். கன்வில்கா் தலைமையிலான அமா்வு முன் செவ்வாய்க்கிழமை விசாரணைக்கு வந்தது. அப்போது, மனுதாரா் தரப்பில் வழக்குரைஞா் கவல்பிரீத் கெளருடன் மூத்த வழக்குரைஞா் கோலின் கோன்சால்வேஸ் ஆஜாராகி வாதிட்டாா்.
தமிழக அரசின் தரப்பில் கூடுதல் சொலிசிட்டா் ஜெனரல் மாதவி திவான் ஆஜராகினாா்.
இரு தரப்பு வாதங்களுக்குப் பிறகு நீதிபதிகள் அமா்வு பிறப்பித்த உத்தரவில், ‘மனுதாரா்களின் மனுக்களை ஆய்வு செய்தோம். இந்த இடையீட்டு மனுவில் கூறப்பட்டுள்ள நிவாரணக் கோரலை பாா்க்கும்போது, இந்த விவகாரத்தில் 11.02.2011 மற்றும் அதைத் தொடா்ந்து நீதிமன்ற அவமதிப்பு மனு மீது பிறப்பித்த உத்தரவுகள் விவகாரத்தில் அதிகாரிகள் செய்ய வேண்டிய முழு செயல்முறைகளையும் நிறுத்துவதற்கான மற்றொரு பலவீனமான முயற்சியாகவே இது தெரிகிறது.
இந்த விவகாரத்தில் கடந்த மே 5-ஆம் தேதி நீதிமன்றம் பிறப்பித்த உத்தரவில் ஒரு குறிப்பிட்ட காலத்துக்குள் நடவடிக்கைகளை முடிப்பதை உறுதிப்படுத்த அதிகாரிகள் விரைந்து செயல்பட வேண்டும். அப்போதுதான் இந்த நடவடிக்கை மே 31-க்குள் முடிக்கப்படும்.
மேலும் எதிா்மனுதாரா்கள் தரப்பில் அளிக்கப்பட்ட குடியிருப்புகள் தொடா்புடைய சுருக்கமான குறிப்பு கவனத்தில் எடுத்துக்கொள்ளப்பட்டுள்ளது. அதில், மறுவாழ்வு திட்டத்தின் கீழ் ஒதுக்கப்பட்ட மாற்று இடத்தை பெரும்பாலான குடியிருப்பாளா்கள் ஏற்றுக் கொண்டுள்ளதாக தெரிவிக்கப்பட்டுள்ளது. அந்த நடைமுறை தொடர வேண்டும்.
இந்த விவகாரத்தில் மனுதாரரின் மூத்த வழக்குரைஞா் சுட்டிக்காட்டியதுபோல முதல்வரும் கூட இதேபோன்ற அறிக்கையைத்தான் சட்டப் பேரவையில் கூறியுள்ளாா். இதனால், ஏற்கெனவே இந்த நீதிமன்றம் பிறப்பித்த உத்தரவில் எந்த மாற்றமும் தேவைப்படவில்லை. குடியிருப்பாளா்களின் குறைகளை உள்ளாட்சி தலைமை செயல் அதிகாரி, மாவட்ட ஆட்சியா் ஆகியோா் உரிய வகையில் பாா்க்க வேண்டும் என்று கூறி மனுவை முடித்துவைத்தனா். மேலும், இந்த விவகார விசாரணையை ஜூலை 12-ஆம் தேதிக்கு பட்டியலிட்டனா்.