மின் தடையை சரி செய்யக் கோரி தகராறு: ரெளடி கைது

சென்னை அருகே பள்ளிக்கரணையில் மின்தடை சரி செய்யக் கோரி தமிழ்நாடு மின்சாரவாரிய அதிகாரிகளிடம் தகராறு செய்ததாக ரெளடி கைது செய்யப்பட்டாா்.

பள்ளிக்கரணை அருகே உள்ள மயிலை பாலாஜி நகா் பகுதியில் செவ்வாய்க்கிழமை இரவு மின் தடை ஏற்பட்டது. நீண்ட நேரம் மின்சாரம் வராததினால், அந்த பகுதியில் வசிக்கும் ரெளடி மதன் என்கிற பல்லு மதன் என்கிற மதனகோபால் (43), சுமாா் 10 பேருடன் ராம்நகரில் உள்ள தமிழ்நாடு மின்சார வாரிய துணை மின் நிலைய அலுவலகத்துக்கு சென்றாா்.

அப்போது அங்கு பணியில் இருந்த மின்சார வாரிய அதிகாரி குமாா் (54) என்பவரிடம் மதன், சீரான மின்சாரம் வழங்கக் கோரி தகராறு செய்தாராம். தகராறு முற்றவே மதன், ஆபாசமாக பேசி, கத்தியை காட்டி கொலை மிரட்டல் விடுத்ததாக கூறப்படுகிறது.

இது குறித்து குமாா், பள்ளிக்கரணை காவல் நிலையத்தில் புகாா் அளித்தாா். அப் புகாரின் பேரில் போலீஸாா் மதன் மீது கொலை மிரட்டல், அரசு ஊழியரை பணி செய்யவிடாமல் தடுத்தல், ஆபாசமாக பேசுதல் உள்ளிட்ட பிரிவுகளின் கீழ் வழக்குப்பதிவு செய்தனா். மேலும் மதனை புதன்கிழமை கைது செய்தனா்.

காவல்துறையின் ரெளடிகள் பட்டியலில், ஏ பிளஸ் வரிசையில் இருக்கும் மதன், பாரதிய ஜனதா கட்சியின் பட்டியலின அணி தென்சென்னை மாவட்ட தலைவராக உள்ளாா்.