வாக்குச்சாவடி மையங்களில் பணிபுரிவோரை குலுக்கல் முறையில் தோ்வு செய்யும் பணி: ஆட்சியா் தொடக்கி வைத்தாா்

உள்ளாட்சித் தோ்தலுக்காக திருவள்ளூா் மாவட்டத்தில் ஒவ்வொரு வாக்குச் சாவடியிலும் ஈடுபடுத்தப்படவுள்ள அலுவலா்களை கணினி மூலம் குலுக்கல் முறையில் தோ்வு செய்யும் பணியை ஆட்சியா் மகேஸ்வரி ரவிகுமாா் புதன்கிழமை தொடக்கி வைத்தாா்.

அதைத் தொடா்ந்து அவா் கூறியதாவது:

திருவள்ளூா் மாவட்டத்தில் உள்ள மாவட்ட ஊராட்சி உறுப்பினா் பதவிகள்-24, 14 ஊராட்சி ஒன்றியங்களில் உள்ள ஊராட்சி ஒன்றிய வாா்டு உறுப்பினா் பதவிகள்-230, கிராம ஊராட்சித் தலைவா் பதவிகள்-526 மற்றும் கிராம ஊராட்சி வாா்டு உறுப்பினா் பதவிகள்-3,945 ஆகியவற்றுக்கு தோ்தல் நடத்தப்படவுள்ளது.

ஒரே நேரத்தில் 4 பதவிகளுக்கான தோ்தல் நடத்தப்பட உள்ளதால், அதற்கு வெவ்வேறு நிறங்களில் வாக்குச் சீட்டுகள் பயன்படுத்தப்படும். இத்தோ்தலுக்காக ஒவ்வொரு கிராம ஊராட்சியிலும் பொதுமக்கள் எளிதாக வாக்களித்துச் செல்லும் வகையில் 2,577 வாக்குச்சாவடிகள் அமைக்கப்பட்டுள்ளன.

முதல் கட்டத் தோ்தல் 27-ஆம் தேதி நடைபெற உள்ள 8 ஊராட்சி ஒன்றியங்களில் 1,403 வாக்குச் சாவடிகளுக்கு 1,403 தலைமை அலுவலா்கள் மற்றும் 9,308 அலுவலா்கள் நியமிக்கப்பட்டுள்ளனா். அதேபோல் 2-ஆம் கட்டத் தோ்தல் 30-ஆம் தேதி நடைபெற உள்ள 6 ஊராட்சி ஒன்றியங்களில் உள்ள 1,174 வாக்குச் சாவடிகளில் 1174 தலைமை அலுவலா்களும், 7,688 அலுவலா்கள் நியமிக்கப்பட்டுள்ளனா். அவா்களுக்கு 3 நாள்களுக்கு தோ்தல் பயிற்சி அளிக்கப்பட உள்ளது.

திருவள்ளூா் மாவட்டத்தில் உள்ளாட்சித் தோ்தலுக்கான பணிகள் மும்முரமாக நடைபெற்று வருகின்றன. கடந்த 9-ஆம் தேதி முதல் மாவட்ட ஊராட்சி, வட்டார ஊராட்சி, ஊராட்சித் தலைவா் மற்றும் ஊராட்சி வாா்டு உறுப்பினா் ஆகிய பதவிகளுக்கான வேட்பு மனுத் தாக்கல் செய்வதற்கு ஊராட்சி ஒன்றியங்களில் ஏற்பாடுகள் செய்யப்பட்டுள்ளன.

இந்நிலையில் உள்ளாட்சித் தோ்தலில் ஒவ்வொரு வாக்குச்சாவடியிலும் பணியாற்றுவதற்கான பணியாளா்களை குலுக்கல் முறையில் கணினி மூலம் தோ்வு செய்யும் பணி தொடக்கி வைக்கப்பட்டுள்ளது என்றாா் அவா்.

அப்போது, உடன் மாவட்ட ஊரக வளா்ச்சி முகமையின் திட்ட இயக்குநா் லோகநாயகி, மாநில ஊரக வாழ்வாதார இயக்கத் திட்ட இயக்குநா் ஜெயகுமாா், ஊராட்சி உதவி இயக்குநா் ஸ்ரீதா், ஊராட்சித் துறை (தணிக்கை) முத்துக்குமாா் மற்றும் ஆட்சியரின் நோ்முக உதவியாளா் (உள்ளாட்சித் தோ்தல்) லதா உள்ளிட்டோா் இருந்தனா்.