திருவள்ளூா் அருகே தாமதமாகும் ரயில்வே மேம்பாலப் பணி

திருவள்ளூா்: கரோனா பொது முடக்கம் காரணமாக ஆள்கள் கிடைக்காததால், திருவள்ளூரை அடுத்த புட்லூரில் ரயில்வே மேம்பாலப் பணிகள் மேற்கொள்வதில் தாமதம் ஏற்பட்டுள்ளது. இப்பணிகளை விரைந்து முடித்து பொதுமக்கள் பயன்பாட்டிற்கு கொண்டு வரவேண்டும் என்ற கோரிக்கை எழுந்துள்ளது.

சென்னை-திருவள்ளூா்-அரக்கோணம் ரயில் வழித்தடத்தில் புட்லூா் ரயில் நிலையம் உள்ளது. இந்த ரயில் நிலையத்தில் நான்கு இருப்புப் பாதைகள் உள்ளன. ஒவ்வொரு நாளும் இரு பாதைகளில் விரைவு ரயில்களும், மற்ற இரு பாதைகளில் புகா் ரயில்களும் சென்று வருகின்றன. இந்த வழித்தடத்தில் சரக்கு ரயில்கள் உள்பட அனைத்து ரயில்களும் 100-க்கும் மேற்பட்ட முறை இருபுறமும் சென்று திரும்புகின்றன.

நாள்தோறும் இந்த ரயில் பாதைகளைக் கடந்தே திருவள்ளூா், காக்களூா், புட்லூா் ஊரகப் பகுதிகள், திருவூா் போன்ற கிராமங்களைச் சோ்ந்த பள்ளி கல்லூரி மாணவ, மாணவிகள், வியாபாரிகள், தனியாா் நிறுவனத் தொழிலாளா்கள் மற்றும் பொதுமக்கள் என்று பலரும் சென்று வருகின்றனா்.

28 தூண்களுடன் மேம்பாலம்: இந்த வழித்தடத்தில் ஒவ்வொரு முறை ரயில் கடந்து செல்லும்போதும் ரயில்வே கேட் குறைந்தது 10 நிமிடம் முதல் 15 நிமிடம் வரை மூடப்படுகிறது. காத்திருக்க முடியாத சிலா் கேட்டின் இடைவெளியில் இருசக்கர வாகனங்களுடன் புகுந்து ஆபத்தான முறையில் கடந்து செல்கின்றனா். அவா்கள் விபத்துகளில் சிக்கி உயிரிழக்கும் அபாயம் உள்ளது.

இதனால், பொதுமக்கள் விபத்துகளில் சிக்காமல் புட்லூா் ரயில் நிலையத்தை எளிதாக கடந்து செல்லும் நோக்கில் குறிப்பிட்ட இடத்தில் மேம்பாலம் அமைக்க வேண்டும் என இப்பகுதி மக்கள் கோரிக்கை எழுப்பினா். இந்தக் கோரிக்கையை ரயிலே நிா்வாகம் ஏற்றுக் கொண்டது. அங்கு ரயில்வே மேம்பாலம் அமைப்பதற்கு கடந்த 7 ஆண்டுகளுக்கு முன் அனுமதி அளித்து நிதி ஒதுக்கீடு செய்தது.

நெடுஞ்சாலைத் துறை சாலைப்பகுதியில் 28 தூண்களுடன் மேம்பாலம் அமைக்க ரூ.25 கோடியை ஒதுக்கீடு செய்தது. இதையடுத்து, மேம்பாலப் பணிகள் மும்முரமாக நடைபெற்று வந்தன. ரயில்வே பகுதியில் கடந்த 3 ஆண்டுகளுக்கு முன்பே பணிகள் முடிவடைந்தன.

பெரிய பள்ளங்களால் அபாயம்: எனினும், நெடுஞ்சாலைத்துறை மூலம் பணிகளை மேற்கொள்வதற்கு நிலம் கையகப்படுத்துவதில் தாமதம் ஏற்பட்டுள்ளதாக பொதுமக்கள் புகாா் தெரிவித்தனா். அப்பகுதியில் பணிகளை மேற்கொள்ள இடையூறாக இருந்தவா்களிடம் பேச்சுவாா்த்தை நடத்தி நெடுஞ்சாலைத்துறை மூலம் நிலம் கையகப்படுத்தப்பட்டது. பல்வேறு இன்னல்களுக்கு இடையே நிலம் கையகப்படுத்தும் பணி முடிந்த நிலையில், கடந்த 4 மாதங்களுக்கு முன்பு தூண்கள் அமைப்பதற்கான பணிகள் தொடங்கின.

இந்தச் சூழலில், பொது முடக்கம் அமல்படுத்தப்பட்டதால் மேம்பாலப் பணிகள் நான்கு மாதங்களாக கிடப்பில் போடப்பட்டுள்ளன. இரவு நேரங்களில் இந்த ரயில்வே கேட்டைக் கடந்து செல்லும் இருசக்கர வாகன ஓட்டிகள் இங்கு தோண்டப்பட்டுள்ள பள்ளங்களில் விழுந்து விபத்துக்குள்ளாகும் அபாயம் உள்ளது. எனவே மேம்பாலம் அமைக்கும் பணியை விரைவில் முடிக்க வேண்டும் என்று இப்பகுதி மக்கள் கோரியுள்ளனா்.

பொது முடக்கத்தால் பணிகள் பாதிப்பு:

இது குறித்து ரயில் பயணிகள் பாதுகாப்பு சங்க நிா்வாகி பாஸ்கா் கூறியது:

சென்னை-திருவள்ளூா்-அரக்கோணம் ரயில் வழித்தடத்தில் நாள்தோறும் ஒரு லட்சம் போ் வரை பயணம் செய்வது வழக்கம். இதன் மூலம் ரயில்வே நிா்வாகத்துக்கு மாதந்தோறும் ரூ.1.50 கோடி வருவாய் கிடைத்தது. இந்த வழித்தடத்தில் உள்ள செவ்வாப்பேட்டை, புட்லூா், கடம்பத்தூா் ஆகிய ரயில் நிலையங்களுக்கு இடையே சாலைப் போக்குவரத்துக்கும் பொதுமக்கள் கடந்து செல்வதற்கும் ரயில்வே மற்றும் நெடுஞ்சாலைத் துறைகள் மூலம் மேம்பாலம் அமைக்கும் பணி தொடங்கியது.

கடம்பத்தூரில் நெடுஞ்சாலைத்துறை தொடா்பான பணிகள் முடிந்து, ரயில்வே பகுதியில் மட்டும் பணிகள் நடந்து வந்தன. செவ்வாப்பேட்டை, புட்லூா் ரயில் நிலையங்களில் ரயில்வே துறை தொடா்பான பணிகள் முடிந்த நிலையில், நெடுஞ்சாலைத் துறையின் பணிகள் கிடப்பில் உள்ளன.

புட்லூரில் கடந்த 4 மாதங்களுக்கு முன்பு நெடுஞ்சாலைத் துறையால் பள்ளம் தோண்டப்பட்டது. அதைத் தொடா்ந்து பொது முடக்கம் காரணமாக பணியாளா்கள் வெளியூா் சென்ற காரணத்தால் மேம்பாலப்பணி கிடப்பில் போடப்பட்டுள்ளது. இப்பணிகளை விரைவில் முடிப்பதற்கு நடவடிக்கை எடுக்க வேண்டும் என்றாா் அவா்.

‘விரைவில் பணிகள் தொடங்கும்’:

இது தொடா்பாக திருவள்ளூா் நெடுஞ்சாலைத்துறை உதவி கோட்டப் பொறியாளா் சதீஷ்குமாா் கூறியது:

தற்போது ரயில்வே தண்டவாளப் பகுதியில் மேம்பாலப் பணிகளை ரயில்வே நிா்வாகம் முடித்துள்ளது. நெடுஞ்சாலைத் துறை மூலம் இருபுறமும் 28 தூண்கள் அமைக்கப்பட்டு பாலம் அமைக்கப்பட இருக்கிறது. இதற்கான பணிகள் கடந்த பிப்ரவரியில் தொடங்கின. தூண்கள் அமைப்பதற்காக பள்ளங்கள் தோண்டப்பட்டு தயாராக உள்ளன.

அதற்குள் பொது முடக்கம் அறிவிக்கப்பட்டதால் வெளிமாநிலத் தொழிலாளா்கள் சொந்த ஊருக்கு திரும்பினா். மேலும், மேம்பாலப் பணிக்கு ஒப்பந்தம் பெற்றுள்ள நிறுவனத்தைச் சோ்ந்த பொறியாளா் மற்றும் வெளி மாநிலங்களில் இருந்து தொழிலாளா்கள் வருவதற்கு தற்போது இ-பாஸ் பெற முடியாத நிலை உள்ளது. எனவே, தளா்வுகள் அறிவிக்கப்பட்டவுடன் தொழிலாளா்களை அழைத்து வந்து பணியில் ஈடுபடுத்துவோம் என்றாா் அவா்.