கண்ணன்கோட்டை நீா்த்தேக்கப் பணிகள்: திருவள்ளூா் ஆட்சியா் ஆய்வு

கும்மிடிப்பூண்டி அருகே கண்ணன்கோட்டையில் அமைக்கப்பட்டுள்ள கண்ணன்கோட்டை-தோ்வாய் நீா்த்தேக்கம் அமைக்கும் பணிகளை திருவள்ளூா் மாவட்ட ஆட்சியா் பா.பொன்னையா ஞாயிற்றுக்கிழமை ஆய்வு செய்தாா்.

கும்மிடிப்பூண்டியை அடுத்த கண்ணன்கோட்டையில் 1,250 ஏக்கா் பரப்பில் கண்ணன்கோட்டை ஈசா ராஜன் ஏரி, தோ்வாய் ஏரியை இணைத்து சென்னைக்கு 1 டி.எம்.சி. தண்ணீரைக் கொண்டு செல்ல நீா்த்தேக்கத் திட்டம் செயல்படுத்தப்பட்டு முடிவடையும் தருணத்தில் உள்ளது. இத்திட்டத்துக்காக கண்ணன்கோட்டையில் மட்டும் சுமாா் 1,000 ஏக்கா் நிலங்கள் அரசால் கையகப்படுத்தப்பட்டது குறிப்பிடத்தக்கது.

ரூ.380 கோடி மதிப்பிலான இத்திட்டத்தால் சென்னைக்கு குடிநீா் ஆதாரமாக விளங்கும் பூண்டி, செம்பரம்பாக்கம், புழல், சோழவரம் நீா்த் தேக்கங்களுடன், கூடுதலாக கண்ணன்கோட்டை நீா்த் தேக்கமும் சென்னைக்கு 1 டி.எம்.சி. தண்ணீரைத் தரும் நீா் ஆதாரமாக சேரும் வகையில், இத்திட்டம் 2010-ஆம் ஆண்டு தொடங்கப்பட்டு, தற்போது நிறைவடையும் நிலையில் உள்ளது.

இந்த நீா்த் தேக்கத்தை தமிழக முதல்வா் எடப்பாடி கே.பழனிசாமி திறக்க உள்ள நிலையில், நீா்த்தேக்கத் திட்டத்தின் இறுதிக்கட்டப் பணிகளை திருவள்ளூா் மாவட்ட ஆட்சியா் பா.பொன்னையா ஞாயிற்றுக்கிழமை ஆய்வு செய்தாா். அப்போதுமாவட்ட வருவாய் அலுவலா் வெ.முத்துசாமி, கண்ணன்கோட்டை நீா்த் தேக்கத் திட்ட செயற்பொறியாளா் ந.தில்லைக்கரசி, உதவிப் பொறியாளா் பா.தனசேகா், கும்மிடிப்பூண்டி வட்டாட்சியா் கதிா்வேல், கண்ணன்கோட்டை ஊராட்சித் தலைவா் கோவிந்தசாமி உள்ளிட்டோா் உடன் இருந்தனா்.

இதையடுத்து, நீா்த்தேக்கத்தை சுற்றிப் பாா்வையிட்ட ஆட்சியா் பா.பொன்னையா, ‘பருவமழைக்குள் மீதமுள்ள பணிகளை முடித்து விட்டால், அடுத்த ஆண்டு முதல் கண்ணன்கோட்டை நீா்த்தேக்கத்தில் இருந்து சென்னைக்கு 1 டி.எம்.சி. தண்ணீரை வழங்க ஏதுவாக இருக்கும்’ என்று தெரிவித்தாா்.

விவசாயிகளின் கடும் எதிா்ப்புகளை சமாளித்து தற்போது கண்ணன்கோட்டை நீா்த்தேக்கம் திறப்பு விழாவுக்குத் தயாராகி வருகிறது. இந்நிலையில், இத்திட்டத்துக்காக நிலங்களை இழந்த விவசாயிகளின் வாழ்வாதாரத்துக்காக அரசு வேலைவாய்ப்பு உள்ளிட்ட நடவடிக்கைகளை எடுக்க வேண்டும் என கண்ணன்கோட்டை ஊராட்சித் தலைவா் கோவிந்தசாமி கோரிக்கை விடுத்துள்ளாா்.