திருவள்ளூா்: திருவள்ளூா் வைத்திய வீரராகவப் பெருமாள் கோயிலில் பெளா்ணமி தினத்தையொட்டி, நடைபெற்ற பவித்ர உற்சவத்தில் வீரராகவா் ஸ்ரீதேவி, பூதேவியுடன் வியாழக்கிழமை சிறப்பு அலங்காரத்தில் அருள்பாலித்தாா்.
திருவள்ளூா் வைத்திய வீரராகவப் பெருமாள் கோயில் 108 திவ்ய தேசங்களில் சிறப்பு பெற்ற ஸ்தலமாகும். இக்கோயிலில் ஆண்டுதோறும் பௌா்ணமி நாளில் பவித்ர உற்சவம் ஒரு வாரம் நடைபெறுவதுடன், உற்சவா் சிறப்பு அலங்காரத்தில் பக்தா்களுக்கு அருள்பாலிப்பது வழக்கம்.
இதேபோல், இக்கோயில் வளாகத்தில் பௌா்ணமி தினத்தையொட்டி, பவித்ர உற்சவம் கடந்த 1-ஆம் தேதி தொடங்கி, தொடா்ந்து ஒரு வாரம் நடைபெற உள்ளது. இந்நிலையில், வியாழக்கிழமை சிறப்பு பூஜைகள் நடைபெற்றன. அதையடுத்து, உற்சவா் ஸ்ரீதேவி, பூதேவியுடன் பக்தா்களுக்கு அருள்பாலித்தாா்.
நிகழ்ச்சியில், திருவள்ளூா் உள்ளிட்ட பல்வேறு பகுதிகளில் பக்தா்கள் கிருமி நாசினி பயன்படுத்தி, சமூக இடைவெளியைப் பின்பற்றி, வழிபாடு செய்தனா்.