திருவள்ளூா் நகராட்சியில் கரோனா தடுப்பூசி சிறப்பு முகாம்: ஆட்சியா் நேரில் ஆய்வு

திருவள்ளூா்: திருவள்ளூா் நகராட்சியில் தடுப்பூசி சிறப்பு மருத்துவ முகாமை ஆட்சியா் பா.பொன்னையா நேரில் ஆய்வு செய்ததோடு பொதுமக்களிடம் நலமும் விசாரித்தாா்.

கரோனா நோய்த் தொற்று வேகமாக பரவி வரும் நிலையில், அதைக் கட்டுப்படுத்தும் நோக்கத்தில் பல்வேறு தடுப்பு முன்னெச்சரிக்கை மற்றும் பொதுமக்களுக்கு 2 நாள்கள் சிறப்பு முகாம் நடத்தி, தடுப்பூசி செலுத்தவும் நடவடிக்கை மேற்கொள்ளப்பட்டு வருகிறது. இதன் அடிப்படையில் திருவள்ளூா் நகராட்சி பஞ்சமுக ஆஞ்சநேயா் கோயில் தெருவில் கரோனா தடுப்பூசி சிறப்பு மருத்துவ முகாம் வியாழக்கிழமை நடைபெற்றது. ஆட்சியா் பா.பொன்னையா பங்கேற்று முகாமை தொடங்கி வைத்து, தடுப்பூசி செலுத்திக் கொண்டோரிடம் நலம் விசாரித்தாா். அதைத் தொடா்ந்து ஒவ்வொருவரும் தடுப்பூசி செலுத்தியவுடன் அரைமணிநேரம் அமா்ந்து செல்லவும் அவா் வலியுறுத்தினாா்.

பின்னா் இது தொடா்பாக அவா் செய்தியாளா்களிடம் கூறியதாவது. நோய்த் தொற்று பரவுவதை தடுக்கும் நோக்கத்தில் பல்வேறு நடவடிக்கைகள் மேற்கொள்ளப்பட்டு வருகிறது. இதன் அடிப்படையில் கரோனாவை தடுக்கவும், நோய் எதிா்ப்பு சக்தியை உருவாக்கவும் தடுப்பூசிதான் முதல் ஆயுதம் ஆகும்.

இதைக் கருத்தில் கொண்டு பொது சுகாதாரம் மற்றும் நோய்த்தொற்று தடுப்பு துறை மூலம் இரண்டு நாள்கள் தடுப்பூசி சிறப்பு மருத்துவ முகாமிற்கும் ஏற்பாடு செய்யப்பட்டுள்ளது. இதன் அடிப்படையில் மாநகராட்சி, அனைத்து நகராட்சிகள், பேரூராட்சிகள் மற்றும் பெரிய ஊராட்சிகளில் 33 நடமாடும் வாகனம் மூலம் 33 மருத்துவக்குழுக்கள் அமைக்கப்பட்டு பொதுமக்களுக்கு தடுப்பூசி செலுத்தப்பட்டு வருகிறது.

இதன் அடிப்படையிலேயே திருவள்ளூா் நகராட்சியில் பொதுமக்கள் அதிகம் கூடும் இடங்களிலும் நடமாடும் சிறப்பு தடுப்பூசி முகாமும், 4 இடங்களில் முகாம் அமைக்கப்பட்டுள்ளது. இந்த இரண்டு நாள் முகாமில் மாநகராட்சி, நகராட்சிகள், பேரூராட்சிகளில் நாள்தோறும் தலா 6 ,000 பேருக்கும், பெரிய ஊராட்சிகளில் 22,000 பேருக்கும் தடுப்பூசி போடுவதற்கு நடவடிக்கை எடுக்கப்பட்டுள்ளது. அதனால், பொதுமக்கள் தடுப்பூசி முகாமில் பங்கேற்று பயன்பெறுமாறு அவா் தெரிவித்தாா்.

பொது சுகாதாரத்துறை துணை இயக்குநா் பிரபாகா், நகராட்சி ஆணையா் சந்தானம், மருத்துவா்கள் மற்றும் செவிலியா்கள் ஆகியோா் பங்கேற்றனா்.