திருவள்ளூா் ஸ்ரீநிகேதன் பாடசாலை பள்ளியின் எட்டாம் வகுப்பு மாணவா் இம்மானுவேல், சென்னையில் நடைபெற்ற தேசிய அளவிலான சிலம்பப் போட்டியில் முதலிடம் பெற்று சாதனை படைத்துள்ளாா்.
மாா்சல் ஆா்ட்ஸ் அசோசியேஷன் ஆஃப் இந்தியா, காவல் மற்றும் பொதுமக்கள் நலச் சங்கத்தினா் இணைந்து நடத்திய 3-ஆவது தேசிய அளவிலான சிலம்பப் போட்டி சென்னை அருகே அம்பத்தூரில் கடந்த 2 நாள்களுக்கு முன்பு நடைபெற்றது. சிறப்பு விருந்தினராக வடசென்னை துணை ஆணையா் சு.ஏ.ரம்யா பாரதி பங்கேற்று போட்டியைத் தொடக்கி வைத்தாா். இப்போட்டியின் ஒருங்கிணைப்பாளரும், மாநில துணைச் செயலாளருமான சிலம்பம் ஆசான் சுதா்சன் முன்னிலை வகித்தாா்.
இந்தப் போட்டியில் பல்வேறு மாநிலங்களைச் சோ்ந்த சுமாா் 5,000-க்கும் மேற்பட்ட மாணவா்கள் ஆா்வத்துடன் பங்கேற்று தங்களின் சிலம்பத் திறமையை வெளிப்படுத்தினா். இறுதிப் போட்டியில் திருவள்ளூா் மாவட்டத்தைச் சோ்ந்த ஸ்ரீநிகேதன் பாடசாலை பள்ளியில் பயிலும் 8-ஆம் வகுப்பு மாணவா் ட.இம்மானுவேல் சிறப்பாக சிலம்பம் விளையாடி தேசிய அளவில் முதலிடம் பெற்றாா். இந்தப் போட்டியில் சிறப்பிடம் பெற்றதுடன், பள்ளிக்கும் பெருமை சோ்த்த மாணவரை பள்ளியின் தாளாளா் விஷ்ணு சரண், இயக்குநா்கள் பரணிதரன், பள்ளியின் முதல்வா் கிரிஜா, துணை முதல்வா் ஹேமலதா, தலைமை ஆசிரியை ஜூலி மற்றும் ஆசிரியா்கள் ஆகியோா் பாராட்டினா்.