அதிமுக சாா்பில் நீா்மோா் பந்தல்

திருவள்ளூா் நகராட்சி பகுதியில் கோடை கால வெப்பத்தைத் தணிக்கும் வகையில், அதிமுக சாா்பில் அமைத்த நீா்மோா் பந்தலை முன்னாள் அமைச்சரும், மேற்கு மாவட்ட செயலாளருமான பி.வி.ரமணா திங்கள்கிழமை தொடங்கி வைத்து பொதுமக்களுக்கு நீா்மோா், தா்பூசணி வழங்கினாா்.

தமிழகம் முழுவதும் கோடை வெயில் வாட்டி வதைத்து வருகிறது. இதனால், அதிமுக பொதுச் செயலாளா் எடப்பாடி பழனிசாமி கோடை வெப்பத்தைத் தணிக்கும் வகையில் நீா்மோா் பந்தல் தொடங்கி குளிா் பானங்களை வழங்க அறிவுறுத்தியிருந்தாா்.

அதன் பேரில், திருவள்ளூா் நகராட்சி ரயில் நிலையம் அருகில் நீா் மோா் பந்தல் தொடங்கி வைக்கும் நிகழ்ச்சி திங்கள்கிழமை நடைபெற்றது.

இந்த நிகழ்ச்சியில் அதிமுக மேற்கு மாவட்ட செயலாளா் மற்றும் முன்னாள் அமைச்சருமான பி.வி.ரமணா பங்கேற்று நீா்மோா் பந்தலைத் தொடங்கி வைத்து பொதுமக்களுக்கு நீா் மோா், குளிா்ச்சியை ஏற்படுத்தும் இளநீா், தா்பூசணி, வெள்ளரிக்காய் உள்ளிட்டவற்றை வழங்கினாா்.

இதேபோல், நகராட்சி பகுதியில் ஆயில் மில், தலைமை அஞ்சல் நிலையம், வட்டாட்சியா் அலுவலகம் மற்றும் பேருந்து நிலையம் அருகே நீா்மோா் பந்தல்களை அவா் தொடங்கி வைத்தாா்.

இந்த நிகழ்வில் மாவட்ட பொருளாளரும், மாவட்ட ஊராட்சி உறுப்பினருமான பாண்டுரங்கன், சிற்றம் சீனிவாசன், நகர செயலாளா் ஜி.கந்தசாமி, நிா்வாகிகள் ராம்குமாா், நகா்மன்ற உறுப்பினா் சித்ரா விஸ்வநாதன் மற்றும் பாலாஜி உள்ளிட்ட பலா் பங்கேற்றனா்.