பெரணமல்லூர் ஊராட்சி ஒன்றியத்துக்கு உள்பட்ட நடுப்பட்டு கிராமத்தை தலைமையிடமாகக் கொண்டு புதிய ஊராட்சி அமைப்பது தொடர்பாக பொதுமக்களின் கருத்துகளைக் கேட்கும் 2-ஆவது அமர்வு கூட்டம் வெள்ளிக்கிழமை (ஜூலை 12) நடைபெறுகிறது.
இதுகுறித்து மாவட்ட ஆட்சியர் கே.எஸ்.கந்தசாமி வெளியிட்ட செய்திக் குறிப்பு: திருவண்ணாமலை மாவட்டம், செய்யாறு வருவாய்க் கோட்டம், பெரணமல்லூர் ஊராட்சி ஒன்றியத்துக்கு உள்பட்ட கோனையூர் ஊராட்சியைச் சேர்ந்த நடுப்பட்டு குக்கிராமத்தின் முதல் வார்டு மற்றும் மேற்கு ஆரணி ஊராட்சி ஒன்றியத்துக்கு உள்பட்ட விண்ணமங்கலம் ஊராட்சியைச் சேர்ந்த நடுப்பட்டு குக்கிராமத்தின் 3, 9-ஆவது வார்டுகள், 4-ஆவது வார்டின் ஒரு பகுதியை (நடுப்பட்டு கிராமம்) இணைத்து தனி ஊராட்சியை அமைக்க முடிவு செய்யப்பட்டுள்ளது.
இதுதொடர்பாக பொதுமக்களின் கருத்துகளைக் கேட்கும் இரண்டாவது அமர்வுக் கூட்டம் திருவண்ணாமலை மாவட்ட ஆட்சியர் அலுவலகத்தில் வெள்ளிக்கிழமை (ஜூலை 12) மாலை 4 மணிக்கு நடைபெறவுள்ளது.
இந்தக் கூட்டத்தில் பொதுமக்கள் கலந்துகொண்டு தங்களது கருத்துகளை நேரடியாகவோ, மக்கள் பிரதிநிதிகள் மூலமாகவோ தெரிவிக்கலாம் என்று அதில் தெரிவிக்கப்பட்டுள்ளது.