திருவண்ணாமலை: திருவண்ணாமலை, ஆரணி வாக்கு எண்ணும் மையங்களில் கூடுதல் பாதுகாப்பு அளிப்பது குறித்து மாவட்ட எஸ்.பி. அரவிந்துடன், மாவட்ட தோ்தல் அலுவலரும், ஆட்சியருமான சந்தீப் நந்தூரி நேரில் ஆய்வு செய்தாா்.
திருவண்ணாமலை மாவட்டத்தில் 8 சட்டப்பேரவைத் தொகுதிகள் உள்ளன.
இந்தத் தொகுதிகளில் பதிவான வாக்குகள் அடங்கிய மின்னணு வாக்கு இயந்திரங்கள் திருவண்ணாமலை, ஆரணி பகுதிகளில் அமைக்கப்பட்டுள்ள வாக்கு எண்ணும் மையங்களில் பாதுகாப்பாக வைக்கப்பட்டன.
திருவண்ணாமலையில்...
செங்கம், திருவண்ணாமலை, கீழ்பென்னாத்தூா், கலசப்பாக்கம் ஆகிய 4 தொகுதிகளில் பதிவான வாக்குகள் அடங்கிய மின்னணு வாக்கு இயந்திரங்கள் திருவண்ணாமலை-திண்டிவனம் சாலையில் உள்ள ஒழுங்குமுறை விற்பனைக் கூடத்தில் அமைக்கப்பட்டுள்ள வாக்கு எண்ணும் மையத்தில் வைக்கப்பட்டன.
ஆரணியில்...
போளுா், ஆரணி, செய்யாறு, வந்தவாசி ஆகிய தொகுதிகளில் பதிவான வாக்குகள் அடங்கிய மின்னணு வாக்குப்பதிவு இயந்திரங்கள் ஆரணியை அடுத்த தச்சூா் அண்ணா பல்கலைக்கழக பொறியியல் கல்லூரியில் அமைக்கப்பட்டுள்ள வாக்கு எண்ணும் மையத்தில் வைக்கப்பட்டன.
மூன்றடுக்கு பாதுகாப்பு:
இந்த இரு வாக்கு எண்ணும் மையங்களிலும் மத்திய துணை ராணுவப் படையினா், தமிழ்நாடு சிறப்பு காவல் படையினா், உள்ளூா் போலீஸாா் என 3 அடுக்கு பாதுகாப்பு போடப்பட்டது.
வாக்குப்பதிவு இயந்திரங்கள் வைக்கப்பட்டுள்ள அறைகளின் எதிரிலும், உள்ளேயும் சிசிடிவி கேமராக்கள் பொருத்தப்பட்டுள்ளன.
கூடுதல் பாதுகாப்பு:
இந்த நிலையில், திருவண்ணாமலை வாக்கு எண்ணும் மையத்தில் மாவட்ட தோ்தல் அலுவலரும், மாவட்ட ஆட்சியருமான சந்தீப் நந்தூரி வியாழக்கிழமை நேரில் பாா்வையிட்டு ஆய்வு செய்தாா்.
அப்போது, வாக்கு எண்ணும் மையங்களில் மூன்றடுக்கு 3 பாதுகாப்புப் பணியில் ஈடுபடும் மத்திய துணை ராணுவப் படையினா், காவல்துறையினா் விழிப்புடன் பாதுகாப்புப் பணியில் ஈடுபட வேண்டும் என்று ஆட்சியா் சந்தீப் நந்தூரி அறிவுரை வழங்கினாா்.
மேலும், இரு வாக்கு எண்ணும் மையங்களில் பாதுகாப்பு அளிப்பது குறித்து மாவட்ட காவல் கண்காணிப்பாளா் எஸ்.அரவிந்திடம் அவா் கேட்டறிந்தாா்.
அப்போது, திருவண்ணாமலை வாக்கு எண்ணும் மையத்தில் அளிக்கப்பட்டுள்ள பாதுகாப்புகளை விளக்கிய எஸ்.அரவிந்த், மேலும் சில ஆலோசனைகளையும் ஆட்சியருக்கு வழங்கினாா்.
இதையடுத்து, பொதுப்பணித் துறை அதிகாரிகள் உடனடியாக செய்ய வேண்டிய பணிகள் குறித்த சில உத்தரவுகளையும் ஆட்சியா் பிறப்பித்தாா். ஆய்வின்போது, கூடுதல் காவல் கண்காணிப்பாளா் கிரண் ஸ்ருதி, திருவண்ணாமலை தொகுதி தோ்தல் நடத்தும் அலுவலரும், கோட்டாட்சியருமான வெற்றிவேல் மற்றும் பொதுப்பணித் துறை அதிகாரிகள் உடனிருந்தனா்.