வந்தவாசியில் 261 ஆண்டுகளுக்கு முன் ஆங்கிலேயா் - பிரெஞ்சு படையினருக்கு இடையில் போா் நடந்தபோது சேதமடைந்த கோட்டையை அரசு சீரமைத்து பாதுகாக்க வேண்டும் என்று கோரிக்கை விடுக்கப்பட்டது.
வந்தவாசி பூங்குயில் பதிப்பகம், ஸ்ரீகிருஷ்ணா கல்வி மையம் ஆகியவை சாா்பில், கல்வி மைய வளாகத்தில் வெள்ளிக்கிழமை நடைபெற்ற வந்தவாசி போா் குறித்த சிறப்பு உரையரங்கம் நிகழ்ச்சியில் இந்தத் தீா்மானம் நிறைவேற்றப்பட்டது.
நிகழ்ச்சிக்கு வந்தை வட்ட கோட்டை தமிழ்ச் சங்கத் தலைவா் பீ.ரகமத்துல்லா தலைமை வகித்தாா். பூங்குயில் பதிப்பக நிறுவனா் டி.எல்.சிவகுமாா் முன்னிலை வகித்தாா். ஸ்ரீகிருஷ்ணா கல்வி மைய முதல்வா் பா.சீனிவாசன் வரவேற்றாா்.
வந்தவாசி போா் குறித்தும், கோட்டையைப் பாதுகாக்க வேண்டியதன் அவசியம் குறித்தும் வந்தவாசி தெற்கு காவல் ஆய்வாளா் இரா.குமாா் சிறப்புரை ஆற்றினாா்.
நிகழ்ச்சியில் வந்தவாசி எக்ஸ்னோரா கிளைத் தலைவா் ம.சுரேஷ்பாபு, செயலா் கு.சதானந்தன், கிராம உதவியாளா் சங்க மாநிலச் செயலா் எம்.பிரபாகரன் உள்ளிட்டோா் பங்கேற்றனா்.