ஜோதி தரிசன யாத்திரை

வந்தவாசியை அடுத்த மாம்பட்டு அண்ணாநகரில் உள்ள ஸ்ரீமுத்துமாரியம்மன் கோயில் சாா்பில் உலக நன்மை வேண்டி ஜோதி தரிசன யாத்திரை திங்கள்கிழமை நடைபெற்றது.

வந்தவாசியை அடுத்த தென்னாங்கூரில் ஜோதியுடன் தொடங்கிய இந்த யாத்திரை வந்தவாசி நகர முக்கிய வீதிகள் வழியாகச் சென்று மாம்பட்டு ஸ்ரீமுத்துமாரியம்மன் கோயிலை அடைந்தது.

யாத்திரையின்போது தென்னாங்கூா் ஸ்ரீபாண்டுரங்கன் ரகுமாயி கோயிலில் இருந்து முத்துமாரியம்மனுக்கு வழங்கப்பட்ட பட்டுப்புடவை, வளையல், மஞ்சள், மாலை, பழங்கள் உள்ளிட்ட சீா்வரிசை கொண்டு செல்லப்பட்டது.

பின்னா், கோயிலில் அம்மனுக்கு பட்டுப் புடவை சாற்றப்பட்டு தீபாராதனை நடைபெற்றது.

கோயில் அறக்கட்டளைச் செயலா் ஆறு.லட்சுமண சுவாமிகள் தலைமையில் நடைபெற்ற இந்த யாத்திரையில் இந்து முன்னணி மாவட்ட பொதுச் செயலா் டி.ஆறுமுகம், அறக்கட்டளை பொருளாளா் ர.செல்வம் மற்றும் பல்வேறு கிராமங்களைச் சோ்ந்த பக்தா்கள் பங்கேற்றனா்.