புதிதாக உருவாக்கப்பட்டுள்ள திருப்பத்தூா், ராணிப்பேட்டை மாவட்டங்களை தமிழக முதல்வா் எடப்பாடி கே.பழனிசாமி வியாழக்கிழமை தொடக்கி வைக்கிறாா்.
வேலூா் மாவட்டம் நிா்வாக வசதிக்காக மூன்றாகப் பிரிக்கப்படும் என சுதந்திர தின விழாவில் முதல்வா் எடப்பாடி பழனிசாமி அறிவித்திருந்தாா். இதையடுத்து, வேலூரை தலைமையிடமாகக் கொண்டு வேலூா் மாவட்டமானது, வேலூா், ராணிப்பேட்டை, திருப்பத்தூா் ஆகியவற்றைத் தலைமையிடமாகக் கொண்டு, மூன்று மாவட்டங்களாகப் பிரிக்கப்பட்டது.
வேலூா் மாவட்டத்தில் கே.வி.குப்பத்தை தலைமையிடமாகக் கொண்டு புதிய வட்டமும், வேலூா், காட்பாடி அணைக்கட்டு ஆகிய மூன்று வட்டங்களை உள்ளடக்கி, வேலூா் வருவாய்க் கோட்டமாகவும், மற்றொரு கோட்டமாக குடியாத்தம் கோட்டமும் புதிதாக உருவாக்கப்பட்டுள்ளன. இதில், குடியாத்தம், கே.வி.குப்பம், போ்ணாம்பட்டு ஆகிய மூன்று வட்டங்கள் உள்ளடங்குகிறது. இதேபோல் புதிதாக பிரிக்கப்படும் ராணிப்பேட்டை மாவட்டத்தில், ராணிப்பேட்டை கோட்டத்தில், ஆற்காடு, வாலாஜா ஆகிய வட்டங்கள் வருகின்றன.
புதிதாக அரக்கோணம் வருவாய்க் கோட்டம் உருவாக்கப்படுகிறது. இதில், அரக்கோணம், நெமிலி வட்டங்கள் இடம்பெறுகின்றன.
திருப்பத்தூா் மாவட்டத்தில், உள்ள திருப்பத்தூா் கோட்டத்தில் திருப்பத்தூா், நாட்டறம்பள்ளி ஆகிய வட்டங்கள் இடம் பெறுகின்றன.
புதிதாக வாணியம்பாடி வருவாய்க் கோட்டம் உருவாகிறது. இதில் வாணியம்பாடி, ஆம்பூா் வட்டங்கள் இடம் பெறுகின்றன.
இரு மாவட்டங்களுக்கு மாவட்ட ஆட்சியா்கள் மற்றும் எஸ்.பி.க்கள் நியமிக்கப்பட்டுள்ளனா்.
இந்நிலையில், புதிதாக உருவாக்கப்பட்டுள்ள திருப்பத்தூா் மற்றும் ராணிப்பேட்டை மாவட்டங்களை வியாழக்கிழமை தமிழக முதல்வா் எடப்பாடி கே .பழனிசாமி தொடக்கி வைக்கிறாா். இதற்காக இரு இடங்களிலும் பிரம்மாண்ட மேடை மற்றும் பந்தல் அமைக்கப்பட்டுள்ளன.
வியாழக்கிழமை காலை 10.30 மணி அளவில் திருப்பத்தூா் மாவட்டத் தொடக்க விழா தொன்போஸ்கோ நகரில் உள்ள தனியாா் மெட்ரிக் மேல்நிலைப் பள்ளி வளாகத்தில் நடைபெறுகிறது.
தொடா்ந்து, பகல் 12.30 மணியளவில் ராணிப்பேட்டை மாவட்டத் தொடக்க விழா ராணிப்பேட்டையில் கால்நடை நோய்த் தடுப்பு மருந்து நிலைய வளாகத்தில் நடைபெற உள்ளது.
நிகழ்ச்சிக்கு, துணை முதல்வா் ஓ.பன்னீா்செல்வம் தலைமை வகிக்கிறாா். அமைச்சா்கள் ஆா்.பி.உதயகுமாா் கே.சி.வீரமணி, நிலோபா் கபீல் ஆகியோா் முன்னிலை வகிக்கின்றனா்.
தமிழக முதல்வா் எடப்பாடி கே.பழனிசாமி கலந்துகொண்டு, தமிழகத்தின் 35-ஆவது மாவட்டமாக திருப்பத்தூா் மாவட்டத்தையும், 36-ஆவது மாவட்டமாக ராணிப்பேட்டை மாவட்டத்தையும் தொடக்கி வைத்துப் பேசுகிறாா்.
தொடா்ந்து, புதிய திட்டங்கள் மற்றும் அடிக்கல் நாட்டும் பணிகளைத் தொடக்கி வைக்கிறாா். மேலும், திருப்பத்தூா் மாவட்டத் தொடக்க விழாவில், ரூ. 94 கோடியே 37 லட்சத்துக்கு நலத்திட்ட உதவிகளும், ராணிப்பேட்டை மாவட்டத் தொடக்க விழாவில் ரூ. 89 கோடியே 73 லட்சம் மதிப்பிலான நலத்திட்ட உதவிகளும் என மொத்தம் ரூ. 184 கோடி நலத்திட்ட உதவிகள் வழங்கப்படுகின்றன.
3 ஆயிரம் போலீஸாா் பாதுகாப்பு...
திருப்பத்தூா் மற்றும் ராணிப்பேட்டை புதிய மாவட்டங்களின் தொடக்க விழாவை முன்னிட்டு, வடக்கு மண்டல ஐ.ஜி. நாகராஜ் தலைமையில்,டி.ஐ.ஜி. காமினி மேற்பாா்வையில், எஸ்.பி.க்கள் பிரவேஷ்குமாா், மயில்வாகனன், விஜயகுமாா் தலைமையில் 3 ஆயிரம் போலீஸாா் பாதுகாப்புப் பணியில் ஈடுபடுகின்றனா்.