குடியாத்தம்: மத்திய அரசின் புதிய வேளாண் சட்டங்களை திரும்பப் பெறக் கோரியும், புது தில்லியில் போராட்டத்தில் ஈடுபட்டுள்ள விவசாயிகள் மீதான தாக்குதலைக் கண்டித்தும் குடியாத்தம் புதிய பேருந்து நிலையம் எதிரே புதன்கிழமை மறியலில் ஈடுபட்ட காங்கிரஸ் கட்சியினா் 45 போ் கைது செய்யப்பட்டனா்.
குடியாத்தம் சட்டப்பேரவைத் தொகுதி காங்கிரஸ் சாா்பில், மாடுகள், ஏா் கலப்பைகளுடன் நடைபெற்ற இந்த மறியல் போராட்டத்துக்கு, கட்சியின் மாநிலப் பொதுக்குழு உறுப்பினா் எஸ்.எம்.தேவராஜ் தலைமை வகித்தாா். வட்டாரத் தலைவா் எம். வீராங்கன் வரவேற்றாா். போ்ணாம்பட்டு நகர காங்கிரஸ் தலைவா் ஜி.சுரேஷ்குமாா் போராட்டத்தைத் தொடக்கி வைத்தாா்.
மாநில மகளிா் காங்கிரஸ் துணைத் தலைவா் ஜே. கிருஷ்ணவேணி, மாவட்ட மகளிா் காங்கிரஸ் தலைவா் ஆா். தேவகிராணி, நிா்வாகிகள் நயீம்பா்வாஸ், துரைமுருகேசன், கோவிந்தராஜ் உள்ளிட்டோா் கலந்து கொண்டனா். போராட்டத்தில் ஈடுபட்ட 3 பெண்கள் உள்பட 45 பேரை போலீஸாா் கைது செய்தனா்.