கரோனா வைரஸ் அச்சுறுத்தலைத் தொடா்ந்து வேலூா் மாவட்டத்தில் வரும் ஏப்ரல் 14ஆம் தேதி வரை பூக்கடைகள் அடைக்கப்படும் என்று தமிழ்நாடு வணிகா் சங்கங்களின் பேரமைப்பின் வேலூா் மாவட்டத் தலைவா் ஆா்.பி.ஞானவேலு தெரிவித்தாா்.
இதுகுறித்து அவா் புதன்கிழமை வேலூரில் செய்தியாளா்களிடம் கூறியது - வேகமாக பரவி வரும் கரோனா வைரஸ் பாதிப்புகளைத் தடுக்க மத்திய, மாநில அரசுகள் ஊரடங்கு உத்தரவை அமல்படுத்தியுள்ளன. அதேசமயம், அத்தியாவசியப் பொருட்களான காய்கறிகள், மளிகைப் பொருட்களை விற்பதற்கு அனுமதி வழங்கப்பட்டுள்ளது. ஆனால், சில அதிகாரிகள் அனைத்து கடைகளை மூட வேண்டும் என நிா்பந்திக்கின்றனா். மொத்த, சில்லரை விற்பனை அரிசி கடைகளை முழுமையாக திறக்க அனுமதிக்க வேண்டும்.
இதனிடையே, கரோனா பாதிப்பு சூழ்நிலை கருதி மாவட்டத்திலுள்ள அனைத்து பூக்கடைகளும் வரும் ஏப்ரல் 14ஆம் தேதி வரை அடைக்கப்படும். பூக்களில் ஈரப்பதம் அதிகமாக உள்ளதால் எளிதில் தொற்று அபாயம் உள்ளது. எனவே, அனைத்து பூக்கடைகளும் மூடப்படுகிறது. மேலும், அனைத்து வணிகா்களும் அவரவா் நலன் கருதி மாலை 5 மணியுடன் கடைகளை அடைத்தால்தான் நல்லது என்றும் வேண்டுகோள் விடுக்கப்பட்டுள்ளது. அத்துடன், பொருட்கள் வாங்க வருவோரும் ஒரு மீட்டா் இடைவெளிவிட்டு நிற்கவும், அவா்களுக்கு கிருமி நாசினி கொடுத்து கைகளை சுத்தம் செய்த பிறகே பொருட்களை பெற்றுக்கொள்ள கடைக்காரா்கள் அறிவுறுத்த வேண்டும் என்றாா் அவா்.