வேலூா் மாவட்டத்தில் சாலை விபத்துகள், போக்குவரத்து நெரிசலைத் தவிா்க்க மேற்கொள்ள வேண்டிய நடவடிக்கைகள் குறித்து மாவட்ட அனைத்துத் துறை அலுவலா்களுடன் மக்களவை உறுப்பினா் டி.எம்.கதிா்ஆனந்த் ஆலோசனை நடத்தினாா்.
மாவட்ட சாலைப் பாதுகாப்பு குறித்த காலாண்டு ஆய்வுக்கூட்டம் ஆட்சியா் அலுவலகத்தில் செவ்வாய்க்கிழமை நடைபெற்றது. வேலூா் மக்களவை உறுப்பினா் டி.எம்.கதிா்ஆனந்த் தலைமை வகித்தாா். மாவட்ட ஆட்சியா் அ.சண்முகசுந்தரம் முன்னிலை வகித்தாா்.
இதில் வேலூா் தலைமைத் தபால் நிலையம், அண்ணா கலையரங்கம் எதிரே பொதுக்கூட்டம், ஆா்ப்பாட்டம், மறியல் போராட்டம் ஆகியவை நடைபெறுவதாலும், பழைய பேருந்து நிலையப் பகுதியில் உள்ள வணிக வளாகம் முன் இருசக்கர வாகனங்கள் சாலையை ஆக்கிரமித்து நிறுத்தப்படுவதாலும் ஏற்படும் போக்குவரத்து நெரிசல் குறித்து ஆலோசிக்கப்பட்டது.
வேலூா் மாநகரில் போக்குவரத்து சிக்னல்கள் அமைத்து இடங்களிலும் பாதசாரி கடக்கும் வெள்ளைக் கோடுகள் அழிந்துள்ளன. அந்தக் கோடுகளை மீண்டும் வரைவது, கிரீன் சா்க்கிள் அருகே உள்ள அணுகு சாலையில் அற்றப்பட்ட வேகத்தடையை மீண்டும் அமைப்பது, அப்பகுதியில் காட்பாடி செல்லும் அணுகு சாலையில் புதிய பாலாறு பாலம் வரையுள்ள சாலையில் ஏற்பட்டுள்ள பழுதுகளைச் சீரமைப்பது ஆகியவை குறித்தும் விவாதிக்கப்பட்டது.
மேலும், வள்ளலாா் சந்திப்பில் உள்ள குறுகிய பாலம் வழியாக இருபுறமும் வாகனங்களும் பொதுமக்களும் அதிக அளவில் செல்வதால் ஏற்படும் போக்குவரத்து நெரிசல், காட்பாடி ரயில் நிலைய மேம்பாலத்தில் இரவு நேரத்தில் விபத்துகளைத் தவிா்க்க மின்விளக்குகளைப் பொருத்துவது, காட்பாடி சித்தூா் பேருந்து நிலையத்தில் இருந்து கல்புதூா் வரை அமைக்கப்பட்டுள்ள சாலைத் தடுப்பில் பொருத்தப்பட்டுள்ள மின் விளக்குகள் சரிவர எரியாததால் விபத்து ஏற்படுவதைத் தடுப்பது குறித்தும் ஆலோசிக்கப்பட்டது.
இதேபோல், காட்பாடி-குடியாத்தம் சாலையில் இருந்து லத்தேரி செல்லும் தேசிய நெடுஞ்சாலையில் உள்ள காட்பாடி வட்டாட்சியா் அலுவலகம் முன்பு அடிக்கடி விபத்து ஏற்படுவதைத் தடுப்பது, லத்தேரி காவல் நிலைய எல்லை தொடக்கம், கரசமங்கலம் இணைப்புச் சாலை, கனகசமுத்திரம் மயானம் வளைவு, ரங்கம்பேட்டை சந்திப்பு அருகே அதிக அளவில் விபத்துகள் ஏற்படுவதைத் தடுப்பது, பொன்னை காவல் நிலைய எல்லையில் உள்ள பொன்னை ஆற்றில் அமைந்துள்ள பாலத்தின் இருபுறமும் மின் விளக்கு அமைப்பது, பொன்னை- சித்தூா்-திருவலம் சாலை சந்திப்பில் வேகத்தடை அமைத்து அங்கு மின்விளக்குகளை அமைப்பது குறித்தும் விவாதிக்கப்பட்டது.
குடியாத்தம், அணைக்கட்டு, கே.வி.குப்பம், போ்ணாம்பட்டு வட்டங்களில் நிலவும் சாலைப் பாதுகாப்பு குறைபாடுகள், அவற்றை சீா்செய்ய மேற்கொள்ள வேண்டிய நடவடிக்கைகள் குறித்தும் விரிவாக ஆலோசனை நடத்தப்பட்டு அதிகாரிகளுக்கு அறிவுறுத்தப்பட்டது.
இக்கூட்டத்தில், மாவட்டக் காவல் கண்காணிப்பாளா் எஸ்.செல்வகுமாா், எம்எல்ஏக்கள் ப.காா்த்திகேயன் (வேலூா்), ஜி.லோகநாதன் (கே.வி.குப்பம்), ஏ.பி.நந்தகுமாா் (அணைக்கட்டு), மாவட்ட வருவாய் அலுவலா் ஜெ.பாா்த்தீபன் உள்ளிட்டோா் கலந்து கொண்டனா்.