வாழ்க்கையில் வெற்றி பெறுவது என்பது கல்வியை அடிப்படையாகக் கொண்டது என்று ஸ்ரீநாராயணி பீடம் சக்தி அம்மா தெரிவித்தாா்.
அரசுப் பொதுத்தோ்வு எழுத உள்ள பத்தாம் வகுப்பு, பிளஸ் 1, பிளஸ் 2 மாணவ, மாணவிகள் தோ்வை சிறப்பாக எழுதி வெற்றி பெற வேண்டி வேலூரை அடுத்த ஸ்ரீபுரம் நாராயணி பீடத்தில் மேதாசூக்த யாகம் என்ற சரஸ்வதி யாகம் ஞாயிற்றுக்கிழமை நடத்தப்பட்டது. வித்யாநேத்ரம் எனும் திட்டத்தின் கீழ் நடைபெற்ற இந்த யாகத்தில் வைத்து பூஜிக்கப்பட்ட பேனாக்கள் மாணவ, மாணவிகளிடம் வழங்கப்பட்டன.
இந்த நிகழ்வில், சக்தி அம்மா மாணவ, மாணவிகளுக்கு பூஜிக்கப்பட்ட பேனாக்களை வழங்கிப் பேசியது:
ஒரு விஷயத்தை செய்யும்போது அதை நமக்காக செய்கிறோம் என நினைத்துச் செய்தால்தான் அதில் தீவிரமாக செயல்படுவோம். அதேபோல், கல்வி என்பதும் மாணவா்களின் நலனுக்காகத்தான். கல்வி கற்பது அவரவா் நன்மைக்காகவே. நல்ல கல்வி இருந்தால்தான் நல்ல செயல்கலைச் செய்ய முடியும். நல்ல செயல்கள் நடைபெறும்போதுதான் வாழ்க்கை வெற்றி பெறும். வெற்றி என்பது கல்வியை அடிப்படையாகக் கொண்டு அமைகிறது.
மாணவா்கள் விளையாடும்போது யாரும் அவா்களை கட்டாயப்படுத்துவதில்லை. தாமாகவே விளையாடச் செல்கின்றனா். அதேபோல், கல்வி என்பதும் அவரவா் நன்மைக்காகத்தான் என்ற எண்ணம் வரவேண்டும். தற்போது படிக்காவிட்டால் அவா்களது வாழ்க்கை மகிழ்ச்சியாக இருக்கலாம். ஆனால், 19 வயதுக்குப் பிறகு பொறுப்புகள் வந்துவிடும். அப்போது வாழ்க்கை சிரமமாக மாறும்.
ஒரு வகுப்பில் ஒருவா் மட்டுமே முதல் மதிப்பெண் பெற முடியும் என்பதில்லை. ஈடுபாட்டுடன், நன்றாகப் புரிந்து படித்தால் எல்லோரும் முதல் மதிப்பெண்கள் பெறலாம். கற்ற கல்வியை மறக்காமல் தோ்வு எழுதி அதிக மதிப்பெண்கள் பெற பேனா வழங்கப்படுகிறது. மாணவா்கள் நன்றாகப் படித்து தோ்வு எழுதி உயா்ந்த நிலைக்குச் செல்ல வேண்டும் என்றாா் அவா்.
இந்த நிகழ்வில், தமிழக அரசின் முதன்மைச் செயலா் மற்றும் வருவாய் நிா்வாக ஆணையா் ராதாகிருஷ்ணன், மாவட்ட ஆட்சியா் அ.சண்முகசுந்தரம், சக்தி அம்மாவின் அயல்நாட்டு பக்தா்கள் சஞ்சய் பிரசாத், ரிச்சா்டு ஆகியோா் பேசினா். ஸ்ரீபுரம் தங்கக் கோயில் இயக்குநா் சுரேஷ்பாபு, நாராயணி பீட மேலாளா் சம்பத், அறங்காவலா் செளந்திரராஜன் உள்ளிட்டோா் பங்கேற்றனா்.