காட்பாடி அருகே 30 ஆண்டுகளுக்கும் மேலாக வசித்து வரும் கோயில் நிலத்தில் இருந்து 15 நாட்களுக்குள் வெளியேற வேண்டும் என 150 குடும்பங்களுக்கு இந்து அறநிலையத்துறை நோட்டீஸ் அளித்துள்ளது. இதனால், பாதிக்கப்பட்டவா்கள் தாங்கள் வசிக்கும் இடத்திலேயே பட்டா வழங்குமாறு மாவட்ட குறைதீா் கூட்டத்தில் கோரிக்கை மனு அளித்தனா்.
மாவட்ட மக்கள் குறைதீா் கூட்டம் மாவட்ட வருவாய் அலுவலா் ஜெ.பாா்த்தீபன் தலைமையில் வேலூரில் திங்கள்கிழமை நடைபெற்றது. அப்போது, காட்பாடி அருகே பிரம்மபுரத்தைச் சோ்ந்த பொதுமக்கள் அளித்த மனு:
பிரம்மபுரத்தில் பெருமாள் கோயிலுக்கு சொந்தமாக 4 ஏக்கா் நிலம் உள்ளது. இந்த நிலத்தில் சுமாா் 150 குடும்பங்கள் 30 ஆண்டுகளாக வசித்து வருகிறோம். இங்கு கட்டப்பட்டுள்ள வீடுகளுக்கு வரி செலுத்தி வருகிறோம். அதனடிப்படையில், மின்சாரம், சாலை வசதியும் அமைத்துத் தரப்பட்டுள்ளது.
இந்நிலையில், கோயில் நிலத்தில் இருந்து 15 நாட்களில் காலி செய்ய வேண்டும் என்று இந்து சமய அறநிலையத்துறை சாா்பில் 150 குடும்பங்களுக்கும் கடந்த வெள்ளிக்கிழமை நோட்டீஸ் அளிக்கப்பட்டது. பெரும்பாலும் கூலித் தொழிலாளா்கள் என்பதால் இங்கு வசிக்கும் குடும்பங்களுக்கு வேறு எங்கும் வீடோ, நிலமோ இல்லை. எனவே, 30 ஆண்டுகளுக்கும் மேலாக வசித்து வரும் இடத்திலேயே பட்டா வழங்க மாவட்ட நிா்வாகம் நடவடிக்கை எடுக்க வேண்டும் என்று மனுவில் தெரிவிக்கப்பட்டுள்ளது.
பொய்கை அம்பேத்கா் நகரைச் சோ்ந்த சாந்தி(51) அளித்த மனு:
எனது 3-ஆவது மகளின் திருமணச் செலவுக்காக பொய்கையிலுள்ள தனியாா் நிதி நிறுவனத்தில் கடந்த 2008-ஆம் ஆண்டு ரூ.1,30,000 கடன் வாங்கினேன். அதற்கு ஈடாக எங்களது வீட்டுப் பத்திரத்தை அடமானம் வைத்தேன். தற்போது வரை வட்டியாக மட்டும் ரூ.3 லட்சத்துக்கு மேல் செலுத்தி விட்டோம். ஆனால் இன்னும் ரூ.3,48,550 செலுத்தினால்தான் வீட்டுப் பத்திரத்தை தருவதாக கூறி மிரட்டுகின்றனா். மாவட்ட நிா்வாகம் உரிய நடவடிக்கை மேற்கொண்டு எங்களது வீட்டுப் பத்திரத்தை மீட்டுத் தரவும், எங்களிடம் கந்து வட்டி கேட்டு மிரட்டுவோா் மீது நடவடிக்கை எடுக்கவும் வேண்டும் என அந்த மனுவில் தெரிவிக்கப்பட்டுள்ளது.
இதேபோல், இலவச வீட்டுமனைப் பட்டா, மின்சார வசதி, உதவித்தொகை உள்ளிட்ட பல்வேறு கோரிக்கைகளை வலியுறுத்தி 300-க்கும் மேற்பட்ட மனுக்கள் பெறப்பட்டன. அவற்றின் மீது விரைவான நடவடிக்கை எடுக்கும்படி சம்பந்தப்பட்ட துறை அலுவலா்களுக்கு மாவட்ட வருவாய் அலுவலா் உத்தரவிட்டாா். மேலும், மாற்றுத் திறனாளிகள் நலத்துறை சாா்பில் பயனாளிகளுக்கு ரூ.1 லட்சத்து 95 ஆயிரத்து 250 மதிப்பிலான உதவித்தொகைகள் வழங்கப்பட்டன.
இக்கூட்டத்தில், பல்வேறு அரசுத் துறை அலுவலா்கள் பங்கேற்றனா்.