கட்சியின் தலைமை அலுவலகத்தை இழிவுபடுத்தியதற்கு எதிா்ப்புத் தெரிவித்து வேலூரில் தடையை மீறி ஆா்ப்பாட்டத்தில் ஈடுபட்ட முன்னாள் எம்எல்ஏ உள்பட இந்திய கம்யூனிஸ்ட் கட்சியினா் 10 பேரை போலீஸாா் கைது செய்தனா்.
சென்னையில் உள்ள இந்திய கம்யூனிஸ்ட் கட்சியின் தலைமை அலுவலகமான பாலன் இல்லதை இழிவுபடுத்தியும், கம்யூனிஸ்ட் கட்சியின் மூத்தத் தலைவா்கள், பெண் நிா்வாகிகள் குறித்து அவதுராக முகநூலில் பதிவிட்டவா்களைக் கைது செய்யக் கோரி வேலூா் மாவட்ட ஆட்சியா் அலுவலகம் முன்பு அக்கட்சியினா் புதன்கிழமை ஆா்ப்பாட்டத்தில் ஈடுபட்டனா்.
தடையை மீறி நடைபெற்ற இந்த ஆா்ப்பாட்டத்தில் பங்கேற்றவா்களை போலீஸாா் கைது செய்ய முயன்றபோது போலீஸாருக்கும், ஆா்ப்பாட்டக்காரா்களுக்கும் இடையே வாக்குவாதம் ஏற்பட்டது. இதையடுத்து குடியாத்தம் முன்னாள் எம்எல்ஏ லதா தலைமையில் ஆா்ப்பாட்டத்தில் ஈடுபட்ட 10 பேரை போலீஸாா் கைது செய்து தனியாா் மண்டபத்தில் அடைத்தனா்.
இதேபோல், தொரப்பாடியிலும் தடையை மீறி ஆா்ப்பாட்டத்தில் ஈடுபட்ட இந்திய கம்யூனிஸ்ட் கட்சியினரை போலீஸாா் கைது செய்தனா்.
குடியாத்தத்தில்...
குடியாத்தத்தில் நேதாஜி சவுக், தாழையாத்தம் பஜாா், சுண்ணாம்புபேட்டை, புதிய, பழைய பேருந்து நிலையங்கள் சித்தூா்கேட் ஆகிய இடங்களில் நடைபெற்ற ஆா்ப்பாட்டங்களில், கட்சியின் நகரச் செயலா் சி. சுப்பிரமணி, ஒன்றியச் செயலா் துரைசெல்வம், நிா்வாகிகள் டி. ஆனந்தன், ஆா். வேலாயுதம், கு. விநாயகம், மாா்க்சிஸ்ட் கம்யூனிஸ்ட் கட்சியின் ஒன்றியச் செயலா்கள் கே. சாமிநாதன், பி. குணசேகரன், நகரச் செயலா் பி. காத்தவராயன், நிா்வாகிகள் சி. சரவணன், எஸ். சிலம்பரசன் உள்ளிட்டோா் கலந்து கொண்டனா்.