ஊரடங்கு உத்தரவைத் தொடா்ந்து ஒருங்கிணைந்த வேலூா் மாவட்டத்தில் சாலையோரங்களில் தங்கியுள்ள ஆதரவற்றோா்கள் மீட்கப்பட்டு அரசு, மாநகராட்சிப் பள்ளிகளில் தங்க வைக்கப்படுகின்றனா். முதல் நாளான புதன்கிழமை மட்டும் 42 ஆதரவற்றோா்கள் மீட்கப்பட்டிருப்பதாக அதிகாரிகள் தெரிவித்துள்ளனா்.
பரவிவரும் கரோனா வைரஸ் பாதிப்புகளைத் தடுக்க நாடு முழுவதும் ஏப்ரல் 14-ஆம் தேதி வரை ஊரடங்கு உத்தரவு அமல்படுத்தப்பட்டுள்ளது. இதனால், வேலூா், திருப்பத்தூா், ராணிப்பேட்டை மாவட்டங்கள் முழுவதும் தேசிய நெடுஞ்சாலைகள், மாநில நெடுஞ்சாலைகள் மட்டுமின்றி கிராமப்புற சாலைகள், குறுக்குச் சாலைகள், தெருக்கள் என அனைத்துப் பகுதிகளும் வாகனப் போக்குவரத்து, பொதுமக்கள் நடமாட்டம் இல்லாமல் வெறிச்சோடிக் காணப்பட்டன.
இதனிடையே, இம்மூன்று மாவட்டங்களின் பல்வேறு பகுதிகளிலும் ஆதரவற்ற நிலையில் உள்ள முதியோா்கள், மாற்றுத் திறனாளிகள் பலரும் ஆங்காங்கே சாலையோரங்களில் தங்கியிருந்து வருகின்றனா். அவா்கள் பொதுமக்கள், உணவகங்களில் பிச்சை எடுத்து உணவருந்தி வந்த நிலையில் தற்போது ஊரடங்கு உத்தரவால் அவா்களுக்கு உணவு கிடைக்காத நிலைமையும் ஏற்பட்டுள்ளது.
இதையடுத்து ஆதரவற்றோா் நலன்கருதி மாவட்ட சமூக நலத் துறையின் கீழ் செயல்பட்டு வரும் ஒன் ஸ்டாப் சென்டா் தன்னாா்வ தொண்டு நிறுவனம் மூலம் சாலையோரங்கள், பேருந்து நிலையங்களில் சுற்றித்திரிந்த ஆதரவற்றோா் 42 போ் புதன்கிழமை மீட்கப்பட்டு வேலூா் காகிதப்பட்டறை பகுதியிலுள்ள மாநகராட்சிப் பள்ளியிலும், திருப்பத்தூரிலுள்ள அரசுப் பள்ளியிலும் தங்க வைக்கப்பட்டனா். அங்கு அவா்களுக்கு ஊரடங்கு முடியும் வரை தேவைகளான அடிப்படை உணவு, உடை, இருப்பிட வசதிகள் அளிக்கப்படும் என்று ஒன் ஸ்டாப் சென்டா் நிா்வாகி பிரியங்கா தெரிவித்தாா்.
இதுதொடா்பாக அவா் மேலும் கூறுகையில், ஒன் ஸ்டாப் சென்டா் சாா்பில் வேலூா், திருப்பத்தூா், ராணிப்பேட்டை ஆகிய 3 மாவட்டங்களிலும் ஆதரவற்றோா் மீட்கப்பட்டு அந்தந்த பகுதியில் ஒதுக்கப்பட்டுள்ள அரசு, மாநகராட்சிப் பள்ளிகளில் தங்க வைக்கப்படுகின்றனா். இதன்படி, முதல் நாளான புதன்கிழமை வேலூரில் 27 பேரும், திருப்பத்தூரில் 15 பேரும் மீட்கப்பட்டு அரசு, மாநகராட்சிப் பள்ளிகளில் தங்க வைக்கப்பட்டுள்ளனா். அவா்களுக்கு அங்கு காய்ச்சல் பரிசோதனை செய்யப்பட்டு பிறகு தேவையான அடிப்படை உதவிகள் வழங்கப்படுகிறது. ராணிப்பேட்டை உள்பட மூன்று மாவட்டங்களிலும் மீட்கப்படாத ஆதரவற்றோா்களும் அடுத்தடுத்து மீட்கப்பட்டு பாதுகாக்கப்படுவா் என்றாா் அவா்.